ලෝක හදවත් දිනය අද (29) ලොව පුරා සැමරෙයි. ලෝක හෘද සම්මේලනය (World Heart Federation – WHF) මගින් වාර්ෂිකව සංවිධානය කරන මෙම දිනයේ ප්රධාන අරමුණ වන්නේ හෘද හා රුධිරවාහිනී රෝග පිළිබඳ ජනතාව දැනුවත් කිරීම, අවදානම් සාධක හඳුනාගැනීම සහ එම රෝගවලින් සිදුවන අකල් මරණ අවම කිරීමයි.මෙවර ලෝක හදවත් දිනයේ තේමාව “Don’t Miss a Beat” හෙවත් “හෘද ස්පන්දනයක්වත් මඟ නොහරින්න” යන්නයි. හෘද රෝගවල ඇතැම් අනතුරු ඇඟවීම් සහ රෝග ලක්ෂණ නොසලකා හැරීම හෝ ප්රමාද කිරීමෙන් ඇතිවිය හැකි අවදානම පිළිබඳව අවධානය යොමු කිරීම මෙවර වැඩසටහනේ විශේෂ අවධානයක් බව ලෝක හෘද සම්මේලනය පවසයි. හෘදයාබාධ සහ ආඝාතය ඇතුළු හෘද හා රුධිරවාහිනී රෝග ලොව ප්රධානතම මරණ හේතුවක් වන අතර, ලෝක හෘද සම්මේලනයට අනුව වසරකට එවැනි රෝග හේතුවෙන් මිලියන 20කට අධික පිරිසක් මියයති. ලෝක සෞඛ්ය සංවිධානයද හෘද හා රුධිරවාහිනී රෝග ලොව ප්රධානතම මරණ හේතුව ලෙස හඳුන්වන අතර, වසරකට ඇස්තමේන්තුගත මිලියන 17.9ක මරණ ඊට සම්බන්ධ බව සඳහන් කරයි. අධි රුධිර පීඩනය, අධික කොලෙස්ටරෝල් සහ රුධිරයේ සීනි මට්ටම ඉහළ යාම මෙන්ම දුම්කොළ භාවිතය, සෞඛ්යයට අහිතකර ආහාර රටාව, ශාරීරික ක්රියාකාරකම් අඩුවීම සහ අධික මත්පැන් භාවිතය හෘද හා රුධිරවාහිනී රෝග සඳහා බලපාන ප්රධාන අවදානම් සාධක ලෙස හඳුනාගෙන තිබේ. මෙවර තේමාව යටතේ රෝග ලක්ෂණ හඳුනාගැනීම, හදවත ආරක්ෂා කර ගැනීම සහ හෘද සෞඛ්යය සඳහා ක්රියාමාර්ග ගැනීම කෙරෙහි අවධානය යොමු කෙරේ. හෘද රෝගවලින් විශාල කොටසක් අවදානම් සාධක පාලනය කිරීම, සෞඛ්ය සම්පන්න ජීවන රටාවක් පවත්වා ගැනීම සහ අවශ්ය අවස්ථාවලදී කඩිනමින් වෛද්ය ප්රතිකාර ලබාගැනීම මගින් වළක්වා ගැනීමට හෝ අවදානම අඩු කිරීමට හැකි බව ලෝක හෘද සම්මේලනය පෙන්වා දෙයි. ඒ අනුව, ලෝක හදවත් දිනය එක් දිනකට සීමා වූ සැමරුමක් නොව, තම හෘද සෞඛ්යය පිළිබඳ නිරන්තර අවධානය යොමු කරමින් අවදානම් සාධක පාලනය කිරීමට සහ රෝග ලක්ෂණ නොසලකා නොහැරීමට ජනතාව පෙළඹවීමේ ගෝලීය දැනුවත් කිරීමේ වැඩසටහනක් ලෙස ක්රියාත්මක වේ.