මෙරට ජ්‍යෙෂ්ඨ පුරවැසියන්ගෙන් සියයට අසූදෙකක් (82%) ඩිජිටල් උපකරණ සහ අන්තර්ජාලය භාවිත කරන බවත් සියයට දාහතයි දශම හතක් (17.7%) ඩිජිටල් උපකරණවලින් සහ අන්තර්ජාල සේවාවන් ලබා ගැනීමෙන් දුරස්ථවී සිටින බවත් සමීක්ෂණයකින් හෙළි වී තිබේ.
මෙම සමීක්ෂණය පවත්වා ඇත්තේ කොළඹ විශ්වවිද්‍යාලය, පේරාදෙණිය විශ්වවිද්‍යාලය සහ එක්සත් ජාතීන්ගේ ජනගහණ අරමුදලේ නියෝජිතයන් ය.
මෙම සමීක්ෂණය සඳහා දිවයිනේ දිස්ත්‍රික්ක විසිපහේම වැඩිම වැඩිහිටි ජනතාව ජීවත්වන ප්‍රාදේශීය ලේකම් කොට්ඨාස ආවරණය වන පරිදි අවුරුදු හැටත් අසූවත් (60-80) අතර වයස් කාණ්ඩයේ වැඩිහිටියන් එක්දහස් අටසිය අනූදෙනෙකු (1890) ආශ්‍රය කරගෙන තිබේ.
මෙම වැඩිහිටියන් අතරින් සියයට 46.7 ක් ෆේස් බුක් සහ වට්ස්ඇප් භාවිතා කරන බවටත් එම මෙවලම් භාවිත කරනු ලබන්නේ සිය දරුවන් සහ ඥාතීන් අතර ජාත්‍යන්තර සබඳතා පවත්වා ගැනීමට බවටත් මෙම සමීක්ෂණයේදී හඳුනාගෙන ඇත.
වැඩිහිටි ප්‍රජාව ඩිජිටල් උපකරණ සහ ජංගම දුරකථන, පරිගණක භාවිතයෙන් බැහැරව සිටිමට හේතු ලෙස ඔවුන් සමාජයෙන් බැහැර කර සිටීම සහ මෙම සේවාවන් ලබා ගැනීමට නිසි පුහුණුවක් ලබා නොදීම, සෞඛ්‍ය ගැටලු, පෙනීමේ දුර්වලතා වැනි සෞඛ්‍ය ගැටලු, සයිබර් අපරාධවලට ඇති බිය, භාෂා ගැටලු හඳුනාගත් බව ද ඔවුහු පෙන්වා දෙති.