නව අධ්‍යාපන ප්‍රතිසංස්කරණ ක්‍රියාවලිය යටතේ ලබන වසරේ සිට සියලු පාසල්වල එක් කාලච්ඡේදයක් විනාඩි පනහක් වන අතර දිනකට උගන්වන කාලච්ඡේද සංඛ්‍යාව හතකට සීමාවන බව අධ්‍යාපන අමාත්‍යංශ ලේකම් නාලක කළුවැව ප්‍රකාශ කරයි.
2026 ජනවාරි 01 දා සිට නව අධ්‍යාපන ප්‍රතිසංස්කරණ ක්‍රියාවලිය ආරම්භ කිරීමට නියමිත අතර, මුලින්ම සියලු පාසල්වල පළමු ශ්‍රේණියට සහ 6 වන ශ්‍රේණියට අදාළව මෙම නව ප්‍රතිසංස්කරණ හඳුන්වා දෙන බවද ලේකම්වරයා සදහන් කරයි.
ඒ අනුව එක සහ හය ශ්‍රේණිවල ගුරුවරුද මෙම නව ප්‍රතිසංස්කරණවලට අදාළව පුහුණු කිරීමට නියමිතව ඇත. එහිදී මූලික වශයෙන් ජාතික අධ්‍යාපන ආයතනය මගින් ගුරුවරු 7500ක් පුහුණු කිරීමට සැලසුම් කර ඇති අතර ක්‍රමයෙන් ගුරු පුහුණුව පළාත් මට්ටමින් ක්‍රියාත්මක කරන බවද හෙතෙම සදහන් කරයි. නව ප්‍රතිසංස්කරණවලට අදාළව මේ වර්ෂය තුළ අවම වශයෙන් ගුරුවරු ලක්ෂයක් පමණ පුහුණු කිරීමට සිදුවන බවද ඔහු පෙන්වා දෙනලදි.
නව අධ්‍යාපන ප්‍රතිසංස්කරණ පිළිබඳව දැනුම්වත් කිරීමේ වැඩමුළුවකදී අධ්‍යාපන ලේකම්වරයා මේ බව අනාවරණය කරනලදි.