ඉල්ලීම් කිහිපයක් මුල්කර ගනිමින් තැපැල් වෘත්තීය සමිති කිහිපයක් ඊයේ (17) මධ්‍යම රාත්‍රියේ සිට අඛණ්ඩ වැඩවර්ජනයක් ඇරඹීය.
තැපැල් හා විදුලි සංදේශ නිලධාරීන්ගේ සංගමය ප්‍රමුඛ ඒකාබද්ධ සමිති පෙරමුණ විසින් කොළඹදී මාධ්‍ය හමුවක් කැඳවා මේ බව දැනුම් දෙන ලදි.
එහිදී එම සංගමයේ ප්‍රකාශකයකු පැවසුවේ විසඳුම් නැති ගැටලුවලට විසඳුම් ඉල්ලා පවත්වන මේ වර්ජනයට රට පුරා සියලුම තැපැල් සේවකයන් සහභාගි වන බවයි.
“රජයන් කිහිපයකටත්, ජනමාධ්‍ය ඇමැතිවරුන් 11 දෙනකුටත්, තැපැල්පතිවරුන් 03 දෙනකුටත් අපේ ගැටලු ඉල්ලීම් අපි ඉදිරිපත් කර තිබෙනවා. එසේ තිබියදීත් විසඳුම් නැති තැනයි අඛණ්ඩ වැඩ වර්ජනයක් ඊයේ මධ්‍යම රාත්‍රියේ සිට ආරම්භ කරන්න තීරණය කළේ. ඒ වගේම මධ්‍යම තැපැල් හුවමාරුවේ සවස 4.00 සිට වැඩ වර්ජනය ආරම්භ කළා. මම නියෝජනය කරන සමස්ත ලංකා තැපැල් සංගමයේ නිල ඇඳුම් අඳින සේවකයන් 13002ක් ඉන්නවා. අති බහුතරයක් අපේ සංගමය නියෝජනය කරනවා. ඒ සියල්ලන්ගේම සහාය අපිට ලැබෙනවා. එම නිසා අපි අඛණ්ඩව වර්ජනය කරන්න කටයුතු කරනවා” යැයි ද ඔහු වැඩිදුරටත් කීවේය.