කොළඹ සහ ගම්පහ දිස්ත්‍රික්කයන්හි ප්‍රදේශ කිහිපයක චිකුන්ගුන්යා රෝගය පැතිරීමේ අවදානමක් පවතින බව වසංගත රෝග විද්‍යා අංශය සඳහන් කරයි.
ඒ අනුව කඩුවෙල, ගොතටුව, බත්තරමුල්ල ආදී ප්‍රදේශවලත් ගම්පහ දිස්ත්‍රික්කයේ ජනාකීර්ණ ප්‍රදේශවලත් මෙම රෝගී තත්ත්වය බහුලවී ඇතැයි වසංගත රෝග පිළිබඳ විශේෂඥ වෛද්‍ය චින්තන පෙරේරා මාධ්‍ය වෙත අදහස් දක්වමින් පවසනලදි.
උණ, ඇඟපත වේදනාව, ඇඟ වෙව්ලීම, හන්දි වේදනාව සහ හන්දි ඉදිමීම මෙම රෝගයේ ලක්ෂණ ලෙස දැකගත හැකි බව කී වෛද්‍යවරයා බොහෝ රෝගීන්ට දින කිහිපයක් ඇතුළත මෙම රෝගය සුව වුවද ඇතැමුන්ට හන්දි වේදනාව කලක් පවතිනු ඇති බවද සඳහන් කරයි.
මෙම රෝග කාරකය ඩෙංගු මදුරුවාගෙන්ම ව්‍යාප්ත වන අතර එම වයිරසය රෝගියකුගෙන් රෝගියකුට බෝ නොවන බව ද ගර්භණී මවුවරු, දරුවන් හා නිදන්ගත රෝගී තත්ත්වයන්ගෙන් පෙළෙන අය මෙම රෝගී තත්ත්වයෙන් වඩා ප්‍රවේසම් විය යුතු බවද වෛද්‍යවරයා වැඩිදුරටත් පවසනලදි.