ඇමරිකානු ජනාධිපති ඩොනල්ඩ් ට්රම්ප් පසුගිය කාලයේ රටවල් රැසක භාණ්ඩ සඳහා ඉහළ තීරු බදු ප‍්‍රකාශ කළත් ඉන්දියානු භාණ්ඩ සඳහා ප‍්‍රකාශ කළ තීරු බද්ද ඒ අතරින් විශාල අවධානයක් දිනාගත්තා. ඒ, එම ප්‍රතිශතය සමස්තයක් ලෙස සියයට 50 ක් තරම් ඉතාම ඉහළ අගයක් ගැනීම නිසා යි. එය ඔහු ප‍්‍රකාශයට පත් කළ ඉහළම තීරු බදු ප‍්‍රතිශතයක්. මෙම තීරුබදු සිද්ධියත් සමග මෙතෙක් ඉතා සමීප මිතුරන් දෙදෙනකු වූ ඉන්දියාව සහ ඇමරිකාව අතර උණුසුම් වෙළෙඳ යුද්ධයක් සහ ආතතියක් වර්ධනය වෙන්නට පටන් ගත්තා. තවමත් එහි අවසානයක් ළඟා වී නැහැ.
මේ වනවිට පෙනෙන්නට ඇත්තේ මෙම “යුද්ධයේ ” දී ට්රම්ප් හමුවේ දණ නමන්නට ඉන්දියාව සූදානම් නැති ආකාරයකු යි.
මෙම සියයට 50 තීරු බද්ද සම්පූර්ණයෙන් කි‍්‍රයාත්මක වීමට පටන් ගත්තේ පසුගිය 27 වැනි දින සිට යි. එයින් සියයට 25 ක තීරු බද්දක් අගෝස්තු 7 වැනි දින සිට කි‍්‍රයාත්මක වෙමින් තිබූ අතර ඊට අමතරව තවත් සියයට 25 ක අමතර තීරු බද්දක් 27 වැනි දින සිට කි‍්‍රයාත්මක වීමට පටන් ගත්තා. මුල් සියයට 25 තීරු බද්ද කි‍්‍රයාත්මක වන්නට ගත්තේ සෙසු බොහෝ රටවලට එරෙහිව ද තීරු බදු කි‍්‍රයාත්මක වන්නට පටන් ගත් අවස්ථාවේ යි.
ට්රම්ප් ඉන්දියාවට මෙම දඬුවම දුන්නේ ඉන්දියාව රුසියාවෙන් විශාල වශයෙන් බොර තෙල් මිල දී ගැනීම නිසා යි. මෙය රුසියාවට යුක්රේනය සමග යුද්ධ කිරීම සඳහා උදව් කිරීමක් හැටියට යි ට්රම්ප් සලකන්නේ. යුක්රේනය සහ රුසියාව අතර යුද්ධයේ දී ඇමරිකාව සිටින්නේ යුක්රේනය පැත්තේ බව රහසක් නොවෙයි. රුසියාව යුක්රේනය සමග යුද්ධය පවත්වාගෙන යන්නේ ප‍්‍රධාන වශයෙන්ම තෙල්වලින් ලැබෙන ආදායම් තුළින් බවට පිලිගැනීමක් තිබෙනවා.
නමුත් එයින් පසු ඇමරිකාව ඉන්දියානු භාණ්ඩ සඳහා තවත් සියයට 25 ක දඬුවම් තීරු බද්දක් ද ප‍්‍රකාශයට පත් කිරීමට පියවර ගත්තා. ට්රම්ප් ඉන්දියාවට මෙම දඬුවම දුන්නේ ඉන්දියාව රුසියාවෙන් විශාල වශයෙන් බොර තෙල් මිල දී ගැනීම නිසා යි. මෙය රුසියාවට යුක්රේනය සමග යුද්ධ කිරීම සඳහා උදව් කිරීමක් හැටියට යි ට්රම්ප් සලකන්නේ. යුක්රේනය සහ රුසියාව අතර යුද්ධයේ දී ඇමරිකාව සිටින්නේ යුක්රේනය පැත්තේ බව රහසක් නොවෙයි. රුසියාව යුක්රේනය සමග යුද්ධය පවත්වාගෙන යන්නේ ප‍්‍රධාන වශයෙන්ම තෙල්වලින් ලැබෙන ආදායම් තුළින් බවට පිලිගැනීමක් තිබෙනවා.
ඉන්දියානු භාණ්ඩ සඳහා දඬුවම් තීරු බද්දක් පැනවීම තුළින් ට්රම්ප් බලාපොරොත්තු වන්නේ රුසියාවට පීඩනයක් එල්ල කර සාම ක්‍රියාදාමයක් සඳහා රුසියාව පොලඹවා ගැනීමට යි.
ඉන්දියාව යනු රුසියානු බොරතෙල් වැඩිම ප‍්‍රමාණයක් මිල දී ගන්නා රටවල් තුනෙන් එකක්. අනෙක් රටවල් දෙක වන්නේ චීනය සහ තුර්කිය යි.
ට්රම්ප් පරිපාලනය සියයට 25 ක දඬුවම් තීරු බද්ද ප‍්‍රකාශයට පත් කළ අවස්ථාවේ බොහෝ දෙනා තුළ කුතුහලයක් ඇති කළ කාරණයක් වූයේ ඉන්දියාව ට‍්‍රම්ප්ට බය වී රුසියාවෙන් තෙල් මිල දී ගැනීම නතර කරනු ඇත් ද යන්න යි. නමුත් දැනට නම් පෙනෙන්නට තිබෙන්නේ ඉන්දියාව ට්රම්ප් ගේ පීඩනයට යටත් වන්නට සූදානම් නැති බවකු යි.
රුසියාවේ සිටින ඉන්දියානු තානාපති විනායි කුමාර් පසුගිය දා මෙයට අදාළව තරමක් දැඩි ප‍්‍රකාශයක් කර තිබෙනු දැකිය හැකි වුණ. ඔහු කියන්නේ ඉන්දියාවට වඩාත් වාසිදායක තැන්වලින් දිගටම තෙල් මිල දී ගැනීම සිදු කරන බව යි. ඒ තුළින් ඉන්දියාවේ ජාතික අවශ්‍යතා සුරක්‍ෂිත කිරීමට කටයුතු කරන බවක් ද තානාපතිවරයා සඳහන් කර තිබෙනවා.
ඉන්දීය අගමැති නරේන්‍ද්‍ර මෝදි ද වක‍්‍ර ලෙස ට්රම්ප් ඉලක්ක කරමින් ඉන්දියාවේ නිදහස් දිනය දා ප‍්‍රකාශයක් කර තිබුණා. ‘ලෝකය පුරාම ආර්ථික ආත්මාර්ථකාමීත්වය හිස ඔසවමින් සිටිනවා. නමුත් අපි අපේ අමාරුකම් ගැන හඬා වැලපෙමින් සිටින්නට අවශ්‍ය නැහැ. අපි මේ අභියෝග පරාජය කරන්න නැගී සිටිය යුතුයි. අනෙක් අයට අපිව පාලනය කරන්න ඉඩ දිය යුතු නැහැ’. අන්න එහෙමයි ඔහු කියා තිබුණේ.
රුසියාව ඉන්දියාවට තෙල් ලබා දෙන්නේ අඩු මිලකට යි. මෙය ඉන්දියානු ආර්ථිකයට විශාල වාසියක් හිමි කර දී තිබෙන කාරණයක් බව අමුතුවෙන් කිව යුතු නැහැ. රුසියාව ඉහත කී ආකාරයෙන් අඩු මිලට බොරතෙල් විකිණීමට පටන් ගත්තේ යුක්රේන යුද්ධය ආරම්භ වීමෙන් පසු ඇමරිකාව ඇතුළු බටහිර රටවල් රුසියානු තෙල්වලට අදාළව විවිධ සම්බාධක පැනවීමට පටන් ගැනීමත් සමග යි. එහි දී රුසියානු තෙල්වලට තිබූ ඉල්ලුම අඩු වූ නිසා රුසියාව අඩු මිලට තෙල් විකිණීමට පටන් ගත්තා. ඉන්දියාව මෙහි වාසිය හිමි කරගනිමින් විශාල වශයෙන් රුසියානු තෙල් මිල දී ගැනීම ආරම්භ කළා.
යුක්රේන යුද්ධය පටන් ගන්නට පෙර ඉන්දියාව රුසියාවෙන් ආනයනය කළේ සම්පූර්ණ තෙල් ආනයනවලින් සියයට 1 කට ආසන්න ප‍්‍රමාණයක් පමණයි. නමුත් දැන් මෙය සියයට 36 ක් පමණ දක්වා ඉහළ ගොස් තිබෙනවා.
ට්රම්ප් පැන වූ තීරු බදු නිසා ඉන්දියාව සහ ඇමරිකාව අතර ඇති වූ වෙළෙඳ යුද්ධය විසඳෙන ආකාරයක් තවමත් පෙනෙන්නට නැහැ. ඔවුන් අතර පසුගිය කාලයේ පැවැත්වෙමින් තිබූ වෙළෙඳ සාකච්ඡාත් මේ වනවිට ඇණහිට තිබෙනවා.
කෙසේ නමුත් ඇමරිකානු තීරු බදු නිසා ඉන්දියාවට දැවැන්ත ආර්ථික බලපෑමක් වනු ඇති බව නිසැකයි. එරට අපනයන ආදායම ඉදිරියේ දී විශාල ලෙස පහත වැටෙනු ඇති. ඉන්දියාව පසුගිය වසරේ ඇමරිකාවට අපනයනය කළ භාණ්ඩවල වටිනාකම ඇ. ඩොලර් බිලියන 87 ක් පමණ බව සඳහන්. ට්රම්ප් ගේ තීරු බද්ද දිගටම කි‍්‍රයාත්මක වුවහොත් ලබන වසර වනවිට මෙය ඇ. ඩොලර් බිලියන 50 ක් පමණ දක්වා පහත වැටෙන්නට ඉඩ ඇති බව විශේෂඥයන් පෙන්වා දෙනවා.
ඇමරිකානු තීරු බදු නිසා ඉන්දියාවේ වඩාත්ම බලපෑමට ලක්වන ක්‍ෂේත‍්‍ර කිහිපයක් හඳුනාගෙන තිබෙනවා. ඒ, රෙදිපිලි, ස්වර්ණාභරණ, සම් භාණ්ඩ, මැණික්, ලී බඩු, කාපට් වැනි නිශ්පාදන ක්‍ෂේත‍්‍ර යි. ඇමරිකාවට කරන මෙම අපනයන සියයට 70 කින් පමණ අඩු වනු ඇති බවයි විශ්ලේෂකයන් පෙන්වා දෙන්නේ. මෙම කර්මාන්තවලට සිදුවන බලපෑම හේතුවෙන් ඉන්දියාවේ ශ‍්‍රමිකයන් මිලියන ගණනක ගේ රැකියාවලට විශාල තර්ජනයක් එල්ල වනු ඇති.
ඇමරිකානු තීරු බදු නිසා ඉන්දියාවේ වඩාත්ම බලපෑමට ලක්වන ක්‍ෂේත‍්‍ර කිහිපයක් හඳුනාගෙන තිබෙනවා. ඒ, රෙදිපිලි, ස්වර්ණාභරණ, සම් භාණ්ඩ, මැණික්, ලී බඩු, කාපට් වැනි නිශ්පාදන ක්‍ෂේත‍්‍ර යි. ඇමරිකාවට කරන මෙම අපනයන සියයට 70 කින් පමණ අඩු වනු ඇති බවයි විශ්ලේෂකයන් පෙන්වා දෙන්නේ. මෙම කර්මාන්තවලට සිදුවන බලපෑම හේතුවෙන් ඉන්දියාවේ ශ‍්‍රමිකයන් මිලියන ගණනක ගේ රැකියාවලට විශාල තර්ජනයක් එල්ල වනු ඇති.
ඉන්දියාව මෙම අර්බුදය කෙසේ ජයගනු ඇත් ද යන්න තවමත් නිශ්චිතව පැවසීමට හැකියාවක් නැහැ. වෙනත් රටවලට කරන අපනයන ඉහළ දමා ගැනීම සඳහා ඉන්දියාව මේ වනවිට විශාල උත්සාහයක් ගනිමින් සිටින අතර ඉන්දියානු භාණ්ඩවලට ඇති දේශීය ඉල්ලූම වැඩි කර ගැනීමටත් පියවර ගනිමින් සිටිනවා. නමුත් ඇමරිකානු වෙළෙඳපොල අහිමි වීමෙන් ඇති වන හිදැස මේ ඔස්සේ පුරවා ගැනීමට හැකි වේවිද යන්න කුතුහලය දනවන කාරණයක්.
කෙසේ නමුත් ඉන්දියාව සහ ඇමරිකාව අතර දැනට ඇණහිට ඇති වෙළෙඳ සාකච්ඡාත් ඉදිරියේදී නැවතත් ආරම්භ වනු ඇතැයි අපේක්‍ෂා කළ හැකියි.
නිහාල් පීරිස්