දිවයින පුරා ඩෙංගු රෝගීන් 30,228ක් හා මරණ 16ක් වාර්තා වී ඇතැයි ජාතික ඩෙංගු මර්දන ඒකකයේ ප්‍රජා වෛද්‍ය විශේෂඥ ප්‍රසිලා සමරවීර මහත්මිය පැවසුවාය. ජාතික ඩෙංගු මර්දන ඒකකයේ පැවති මාධ්‍ය හමුවකට එක්වෙමින් ඇය මෙසේ පැවසුවාය.
පළාත් වශයෙන් ගත්කල බස්නාහිර, සබරගමුව, නැඟෙනහිර හා දකුණු පළාත්වලින් වැඩි ඩෙංගු රෝගීන් ප්‍රමාණයක් වාර්තා වී ඇත. සෞඛ්‍ය වෛද්‍ය නිලධාරි කොට්ඨාස වශයෙන් ගත් විට කොළඹ දිස්ත්‍රික්කයේ සෞඛ්‍ය වෛද්‍ය නිලධාරි කොට්ඨාස 15ක්, ගම්පහ දිස්ත්‍රික්කයේ සෞඛ්‍ය වෛද්‍ය නිලධාරි කොට්ඨාස 13ක් හා රත්නපුර සෞඛ්‍ය වෛද්‍ය නිලධාරි කොට්ඨාස 13ක් ඩෙංගු වැඩි අවදානම් ප්‍රදේශ බව සෞඛ්‍ය අංශ අනාවරණය කරගෙන තිබේ.
පාසල්, රජයේ ආයතන, කර්මාන්තශාලා, වැඩබිම් හා ආගමික ස්ථාන වැඩිම ඩෙංගු අවදානමක් සහිත පරිශ්‍ර බව පසුගිය ජූනි මස 30 සිට ජූලි මස 05 වැනිදා දක්වා පැවති මදුරු මර්දන සතිය වැඩසටහන මඟින් තහවුරුව ඇතැයි ද ඇය සඳහන් කළාය.