ශ්රී ලංකා කායික වෛද්ය විද්යායතනය (SLCIM)විසින් 2026 වර්ෂය සඳහා එහි සභාපතිනිය ලෙස විශේෂඥ වෛද්ය නිරෝෂා මධුවන්ති හෙට්ටිආරච්චි මහත්මිය තෝරා පත් කරගෙන ඇත.
ශ්රී ලංකා කායික වෛද්ය විද්යායතනය යනු 2016 වසරේදී පිහිටුවන ලද ලාභ නොලබන වෘත්තීය සංවිධානයක් වන අතර, එය මේ වන විට ශ්රී ලංකාවේ කායික වෛද්ය ක්ෂේත්රය වෙනුවෙන් දශකයක පමණ කාලයක සේවාවක් සපුරා ඇත. කායික වෛද්ය විද්යාව පිළිබඳ විශේෂඥ වෛද්යවරුන් නියෝජනය කරන මෙම ආයතනය පිහිටුවන ලද්දේ වෛද්ය දැනුම ඉහළ නැංවීම, පශ්චාත් උපාධි අධ්යාපනය ප්රවර්ධනය කිරීම සහ උසස් තත්ත්වයේ රෝගී සත්කාර සහතික කරමින් ජාතියේ සෞඛ්යයට අර්ථවත් දායකත්වයක් ලබාදීමේ අරමුණ ඇතිවය. අඛණ්ඩ වෛද්ය අධ්යාපනය, පර්යේෂණ, ශාස්ත්රීය සහයෝගිතාව, නායකත්ව සංවර්ධනය සහ වාර්ෂික විද්යාත්මක සැසිවාර මෙන්ම ‘Asian Journal of Internal Medicine’ වැනි ශාස්ත්රීය ප්රකාශන ඇතුළු ජාතික මට්ටමේ ශාස්ත්රීය ක්රියාකාරකම් හරහා ශ්රී ලංකාවේ කායික වෛද්ය පරිචය සහ අධ්යාපනය ශක්තිමත් කිරීමෙහිලා මෙම වෛද්ය විද්යායතනය ප්රධාන භූමිකාවක් ඉටු කරයි.
ශ්රී ලංකා කායික වෛද්ය විද්යායතනය වෛද්ය වෘත්තිය සහ පොදු මහජනතාව වෙනුවෙන් පුළුල් පරාසයක ක්රියාකාරකම් සිදු කරයි. වෛද්ය විද්යායතනයේ ප්රධාන විද්යාත්මක සමුළුව වන ‘SIMCON’ වාර්ෂික අධ්යයන සැසිවාර සහ කායික වෛද්යවරුන් සඳහා අඛණ්ඩ වෘත්තීය සංවර්ධන අවස්ථා ලබා දෙන විවිධ අධ්යාපනික වැඩසටහන් මීට ඇතුළත් වේ. මීට අමතරව, විද්යාලය විසින් විශේෂයෙන්ම නිවර්තන රෝග සම්බන්ධ වෛද්ය විද්යාව සහ බෝ නොවන රෝග පිළිබඳ සායනික පර්යේෂණ ප්රවර්ධනය කිරීම, මහජන සෞඛ්ය වෙනුවෙන් පෙනී සිටීම සහ සෞඛ්ය ප්රතිපත්ති, මාර්ගෝපදේශ සහ ජාතික සෞඛ්ය මුලපිරීම් සංවර්ධනය කිරීමේදී සෞඛ්ය අමාත්යාංශයට විශේෂඥ උපදෙස් ලබා දීම සිදු කරයි.
විශේෂඥ වෛද්ය මධුවන්ති හෙට්ටිආරච්චි මහත්මිය, විශ්රාමික අධ්යාපන අධ්යක්ෂ නිමල් හෙට්ටිආරච්චි මහතාගේ සහ විශ්රාමික නියෝජ්ය විදුහල්පතිනි මංගලිකා හෙට්ටිආරච්චි මහත්මියගේ වැඩිමහල් දියණියයි. කෑගල්ල ශාන්ත ජෝසප් බාලිකා විද්යාලයේ කීර්තිමත් ආදි ශිෂ්යාවක වන ඇය, පාසල් සමයේ දී මනා අධ්යාපනික පදනමක්, ශිෂ්ය නායකත්වයේ ක්රියාකාරී මැදිහත්වීමක් සහ පුළුල් විෂය බාහිර උනන්දුවක් පෙන්නුම් කළ අති දක්ෂ සිසුවියකි. අනතුරුව ඇය කැලණිය විශ්ව විද්යාලයේ වෛද්ය පීඨයට ඇතුළත් වී සිය වෛද්ය උපාධිය සම්පූර්ණ කළ අතර, එහිදී සිය පුහුණු කාලය පුරාම අධ්යයන කටයුතු වෙනුවෙන් දැඩි කැපවීමක් කර තිබේ. පසුව ඇය පේරාදෙණිය ශික්ෂණ රෝහලේ දී සාමාන්ය වෛද්ය විද්යාව පිළිබඳ පශ්චාත් උපාධි පුහුණුව ලබා කොළඹ විශ්වවිද්යාලයේ පශ්චාත් උපාධි වෛද්ය විද්යායතනයෙන් වෛද්ය විද්යාව පිළිබඳ ශාස්ත්රපති (MD) උපාධිය ලබා ගත්තාය. ඉන් අනතුරුව ඕස්ට්රේලියාවේ විදේශ පශ්චාත් උපාධි සායනික පුහුණුව ලැබූ ඇය, සාමාන්ය වෛද්ය විද්යාව පිළිබඳ මාණ්ඩලීය සහතික ලත් විශේෂඥ වෛද්යවරියක ලෙස පත් කරනු ලැබුවාය. වෛද්ය හෙට්ටිආරච්චි මහත්මිය දැනට පේරාදෙණිය ශික්ෂණ රෝහලේ කායික වෛද්ය විද්යාව සහ ධූලකවේදය (Toxicology – විෂ විද්යාව) පිළිබඳ විශේෂඥ වෛද්යවරියක ලෙස කටයුතු කරන අතර සායනික වෛද්ය විද්යාව, වෛද්ය අධ්යාපනය, පර්යේෂණ සහ ජාතික සෞඛ්ය ප්රතිපත්ති සඳහා ඇය ලබා දුන් දායකත්වය පුළුල් ලෙස පිළිගැනීමට ලක්ව ඇත. ඇය ලංකා වෛද්ය විද්යායතනයේ (Ceylon College of Physicians), ඇමරිකානු වෛද්ය විද්යායතනයේ සහ එඩින්බරෝ රාජකීය වෛද්ය විද්යායතනයේ අධිසාමාජිකාවකි.
සෞඛ්ය අමාත්යාංශයේ අධික රුධිර පීඩනය පිළිබඳ මාර්ගෝපදේශවල ප්රධාන කතුවරිය ලෙසත්, ජාතික දියවැඩියා කළමනාකරණ මාර්ගෝපදේශවල කතුවරියක සහ කමිටු සාමාජිකාවක ලෙසත් කටයුතු කරමින් විශේෂඥ වෛද්ය මධුවන්ති හෙට්ටිආරච්චි මහත්මිය ජාතික මාර්ගෝපදේශ සංවර්ධනය සඳහා සැලකිය යුතු දායකත්වයක් ලබාදී ඇත. ඇයගේ වෘත්තීයමය උනන්දුව බෝ නොවන රෝග, සායනික ධූලකවේදය, නිවර්තන රෝග ආසාදන සහ සර්ප දෂ්ටනය පිළිබඳ විෂ විද්යාව දක්වා විහිදෙන අතර, ඇයගේ කාර්යයන් සාක්ෂි මත පදනම් වූ වෛද්ය පරිචය සහ ජාතික යොමු කිරීමේ සේවාවන් ශක්තිමත් කිරීමට උපකාරී වී ඇත. පළපුරුදු ශාස්ත්රඥවරියක සහ පර්යේෂකවරියක වන විශේෂඥ වෛද්ය හෙට්ටිආරච්චි මහත්මිය සමකාලීන සමාලෝචනයට ලක්වූ ප්රකාශන සහ ශාස්ත්රීය ලේඛන රචනා කර ඇති අතර, උපාධි අපේක්ෂක සහ පශ්චාත් උපාධි වැඩසටහන්වල පරීක්ෂකවරියක සහ පුහුණු කරන්නියක ලෙස ද කටයුතු කර තිබේ. ඇය ශ්රී ලංකා කායික වෛද්ය විද්යායතනයේ ආරම්භක ඒකාබද්ධ ලේකම්වරිය වූ අතර, විද්යායතනයේ සඟරාව වන ‘Asian Journal of Internal Medicine’ හි නිර්මාතෘ සහ වත්මන් ඒකාබද්ධ ප්රධාන කර්තෘවරියද වේ. ශ්රී ලංකා කායික වෛද්ය විද්යායතනය ආරම්භයේ සිටම ප්රධාන ශාස්ත්රීය හා නායකත්ව භූමිකාවන් දරමින් ඇය අඛණ්ඩ සේවයක් ඉටුකර තිබේ. ඇයගේ මෙම පත්වීම, ශ්රී ලංකා කායික වෛද්ය විද්යායතනයේ මෙහෙවර වන උසස් තත්ත්වයේ රෝගී සත්කාර, වෘත්තීය විශිෂ්ටත්වය සහ ජාතියේ යහපත උදෙසා කායික වෛද්ය ක්ෂේත්රයේ නායකත්වය ප්රවර්ධනය කිරීම කෙරෙහි දක්වන අඛණ්ඩ කැපවීම මැනවින් පිළිබිඹු කරයි.