මහනුවර ඇසළ පෙරහරේ ප්‍රථම කුඹල් පෙරහර අද (30) වීදී සංචාරය කරයි.
ශ්‍රී දළදා මාලිගාව අබියසින් රාත්‍රී 7.05ට ගමන් ආරම්භ කරන පෙරහර දළදා වීදිය, ඩී.එස්. සේනානායක වීදිය, පන්සල පාර, දේව වීදිය, කොළඹ වීදිය, යටිනුවර වීදිය ඔස්සේ ගමන් ගෙන රජ වීදියෙන් ඉහළට විත් ගෙවදීමට නියමිතයි.
කුඹල් පෙරහර දින 05ක් වීදි සංචාරය කිරීමෙන් පසු අගෝස්තු 04 වැනි දින රන්දෝලි පෙරහර වීදී සංචාරය කරයි. රන්දෝලි මහපෙරහර නිකිණි පුන් පොහෝ දිනය යෙදෙන 08 දින වීදී සංචාරය කිරීමෙන් අනතුරුව පසුදින අලුයම ගැටඹේ දියකපනා තොටේ දී දිය කැපුම් මංගල්‍යය සිදු කෙරෙයි.
දවල් පෙරහර 09 දින වීදි සංචාරය කිරීමෙන් පසු මෙවර මහනුවර ඇසළ පෙරහර නිමාවට පත්වනු ඇත.
මහනුවර ඇසළ පෙරහරේ ආරක්ෂාව වෙනුවෙන් පොලීසියේ හා යුද හමුදාවේ 6000ක පමණ පිරිසක් යොදවා තිබේ.