ඊයේ ( 28) දින සිට ක්‍රියාත්මක වන පරිදි ජනාධිපති අනුර කුමාර දිසානායක මහතා විසින් දිවයින පුරා හදිසි නීතිය පනවනු ලැබ තිබේ.මෙලෙස හදිසි නීතිය පනවා ඇත්තේ.මහජන ආරක්ෂාව සහ රටේ යහපැවැත්ම සුරක්ෂිත කිරීම, මහජන ජීවිතය පවත්වාගෙන යාම සඳහා අත්‍යවශ්‍ය ආහාර ද්‍රව්‍ය සැපයීම හා සේවා පවත්වාගෙන යාමේ අරමුණිනි. ඊයේ සිට ක්‍රියාත්මක වන පරිදි මෙලෙස දිවයින පුරා හදිසි නීතිය පැන වූ බව ජනාධිපති ලේකම් සනත් නන්දිත කුමානායක මහතා ගේ අත්සනින් නිකුත් කෙරුණු ගැසට් නිවේදනයේ දැක්වේ.ඊයේ පෙරවරුවේ ත්‍රිවිධ හමුදා ආරක්ෂක මුලස්ථානයේ දී ජනාධිපතිවරයා සමග පැවති සාකච්ඡාවේදී රට තුළ මතුව ඇති අවදානම් තත්ත්වය සහ මුදා ගැනීමේ සහ සහන සේවා කටයුතු කාර්යක්ෂම කිරීම වෙනුවෙන් අවශ්‍ය නම් හදිසි නීතිය ක්‍රියාත්මක කරන ලෙස විපක්ෂයේ මන්ත්‍රීවරුන් ද යෝජනා කළ අතර ඒ සඳහා පූර්ණ සහාය ලබා දෙන බව ඔවුහු ප්‍රකාශ කළහ.