වයස අවුරුදු 60 ඉක්ම වූ ජ්‍යෙෂ්ඨ පුරවැසියන් ඉලක්ක කරගත් විශේෂ පොලී අනුපාත යෝජනා ක්‍රමයක් ජූලි මස පළමුවනදා සිට ක්‍රියාත්මක වන බව මුදල් අමාත්‍යාංශය නිවේදනය කර ඇත.මෙය කලෙක සිට ජ්‍යෙෂ්ඨ පුරවැසි ප්‍රජාව විසින් බලධාරීන් ගෙන් කළ ඉල්ලීමකි.මෙම නව වැඩපිළිවෙළ යටතේ, වෙළෙඳපොළේ පවතින සාමාන්‍ය වාර්ෂික පොලී අනුපාතිකයට වඩා සියයට 3ක අතිරේක පොලියක් වසරක ස්ථාවර තැන්පතු සඳහා පිරිනැමේ. එක් අයෙකුට මෙම යෝජනා ක්‍රමය යටතේ තැන්පත් කළ හැකි උපරිම මුදල රුපියල් මිලියනයකට සීමා කර ඇති බව මුදල් අමාත්‍යාංශය වැඩිදුරටත් අවධාරණය කරයි.මෙම විශේෂ පොලී අනුපාතය සහිත ස්ථාවර තැන්පතු, 2025 ජූලි මස 01 වන දින සිට දෙසැම්බර් 31 වන දින දක්වා කාලය තුළ විවෘත කිරීමට අවස්ථාව සලසා දී තිබේ. එසේ විවෘත කරනු ලබන සියලුම තැන්පතු අනිවාර්යයෙන්ම මාස 12ක කාලයක් සඳහා පවත්වාගත යුතු ය.මෙම ගිණුමක් ආරම්භ කිරීම සඳහා, ජ්‍යෙෂ්ඨ පුරවැසියන් තම ජාතික හැඳුනුම්පත සහ දේශීය ආදායම් දෙපාර්තමේන්තුව මගින් නිකුත් කරන ලද බදු ගෙවන්නා හඳුනාගැනීමේ අංකය (ඨෛණ්) රැගෙන තමන් ගනුදෙනු කරන බැංකු ශාඛාව වෙත පැමිණිය යුතු වේ.ජ්‍යෙෂ්ඨ පුරවැසියන්ගේ ස්ථාවර තැන්පතු සහ ඉතිරිකිරීම් සඳහා ඉහළ ප්‍රතිලාභයක් ලබා දෙමින් ඔවුන්ට අමතර මූල්‍ය ශක්තියක් ලබා දීම මෙම වැඩසටහනේ ප්‍රධාන අරමුණ බව මුදල්, ක්‍රමසම්පාදන සහ ආර්ථික සංවර්ධන අමාත්‍යාංශය පවසයි.