මහව වනජීවී කලාපයට අයත් පොල්පිතිගම ප්‍රදේශයේ දැනට දැඩි සේ රෝගාතුරව සිටින භාතිය ඇතාගේ තත්වය මේ වන විට කෙමෙන් යහපත් අතට හැරෙමින් පවතින බවත් ශරීරයේ තිබූ තුවාල බොහොමයක් සුව වෙමින් පවතින බවත් පශු වෛද්‍ය තරිඳු විජේකෝන් මහතා පවසයි. ඇතු ගේ පාදයක සිලම්බු අඩිය ගැලවී ගිය කකුලට ප්‍රතිකාර කිරීම ඊයේත් සිදු කරන ලදී.එමෙන්ම වෙනදාට සාපේක්ෂව භාතිය හස්තියා මේ වන විට හොදින් ආහාර ලබාගන්නා බව ද වාර්තා වේ. මහව වනජීවී කාර්යාලයේ නිලධාරීන් ඒ සඳහා දිවා රාත්‍රී කැපවීමෙන් කටයුතු කරනු දැක ගත හැකිය.මේ අතර පශු වෛද්‍ය නිර්දේශ මත භාතිය හස්තියා නිදා සිටින ඇලය වෙනස් කිරීම හෙට (14) සිදු කරන බව පශු වෛද්‍ය තරිදු විජේකෝන් මහතා පැවසීය. ඒ සඳහා කටයුතු සූදානම් කරමින් සිටින බව ඔහු පවසයි.වනජීවී පශු වෛද්‍ය ඒකකයේ අධ්‍යක්ෂ පශු වෛද්‍ය තාරක ප්‍රසාද් මහතා දැනුවත් කර මහාචාර්ය අශෝක දංගොල්ල මහතාගේ අධීක්ෂණය යටතේ ඇතා වැතිර සිටින පැත්ත මාරු කිරීමට නියමිතය. යුද හමුදාවේ සහය ද ඊට හිමිවේ.ඉතා සීරු මාරුවට කළ යුතු ඒ සඳහා අවශ්‍ය උපකරණ කිහිපයක් මේ වන විටත් ලැබී ඇති අතර අනෙක් කටයුතු සූදානම් කෙරෙමින් පවතී