තට්ටු නිවාස ඉදි කිරීම සහ එවායේ ජීවත් වීම අද එක්තරා විදියක විලාසිතාවක් බවට පත්ව ඇති බව පෙනෙනවා. වර්තමානයේ නාගරික ප්‍රදේශවල පවතින ඉඩම් හිඟයටත් තට්ටු නිවාස ක්‍රමය විසඳුමක් වී ඇති බව පැවසිය හැකියි.
කෙසේ හෝ වේවා, මෙවැනි තට්ටු නිවාසවල ආරක්ෂාව සම්බන්ධයෙන් ඇස් අරවන ආකාරයේ ඛේදවාචකයක් ගැන පසුගිය දිනවල හොංකොං දේශයෙන් වාර්තා වුණා.
පසුගිය නොවැම්බර් 26 වැනි දින පස්වරු 2.50 ට පමණ හොංකොං හි සුවිසල් තට්ටු නිවාස සංකීර්ණයක මහා ගින්නක් හටගත්තා. මෙම තට්ටු නිවාස සංකීර්ණය හැඳින්වෙන්නේ Wang Fuk Court යන නමින්. මෙම සටහන ලියන අවස්ථාව වනවිට පළ වී තිබූ වාර්තාවලට අනුව ගින්නෙන් 128 දෙනෙකු මරණයට පත්ව තිබුණා. තවත් 200 දෙනෙකු පමණ අතුරුදන් බවත් පැවසෙනවා. තුවාල ලබා සිටි ගණන 80 කට ආසන්න යි.
හොංකොං හි තායි පෝ නැමැති ප්‍රදේශයේ පිහිටා ඇති මෙම තට්ටු නිවාස සංකීර්ණය උස් ගොඩනැගිලි 8 කින් සමන්විත යි. මේ සෑම ගොඩනැගිල්ලකම මහල් 31 බැගින් ඇති බවත් සඳහන් වෙනවා. එකිනෙකට ආසන්නව පිහිටා ඇති මෙම ගොඩනැගිලි 8 න් 7 ක්ම ඉහත කී ගින්නට ගොදුරු වී තිබුණා. මෙම ගොඩනැගිලිවලින් ගිනිදැල් බුර බුරා නගින ආකාරය දැක්වෙන බිහිසුණු විඩියෝ දර්ශණ මාධ්‍ය තුළින් දැකගන්නට ලැබුණා. එම ගින්නට හසු වූ පුද්ගලයන් මුහුණු දුන් අත්දැකීමෙ හි බිහිසුණු බව සිතා ගැනීමටත් අසීරු යි.
මෙම ගින්න වසර 60 කින් මෙපිට හොංකොං හි ඇති වූ දරුණුම ගින්න හැටියට යි සැලකෙන්නේ.
හොංකොං හි තායි පෝ නැමැති ප්‍රදේශයේ පිහිටා ඇති මෙම තට්ටු නිවාස සංකීර්ණය උස් ගොඩනැගිලි 8 කින් සමන්විත යි. මේ සෑම ගොඩනැගිල්ලකම මහල් 31 බැගින් ඇති බවත් සඳහන් වෙනවා. එකිනෙකට ආසන්නව පිහිටා ඇති මෙම ගොඩනැගිලි 8 න් 7 ක්ම ඉහත කී ගින්නට ගොදුරු වී තිබුණා. මෙම ගොඩනැගිලිවලින් ගිනිදැල් බුර බුරා නගින ආකාරය දැක්වෙන බිහිසුණු විඩියෝ දර්ශණ මාධ්‍ය තුළින් දැකගන්නට ලැබුණා. එම ගින්නට හසු වූ පුද්ගලයන් මුහුණු දුන් අත්දැකීමෙ හි බිහිසුණු බව සිතා ගැනීමටත් අසීරු යි.
කුඩා දරුවන් පවා මෙයින් මිය ගොස් සිටිනවා විය හැකියි. නමුත් මේ ගැන නිශ්චිත වශයෙන් මාධ්‍ය තුළ පළ වුණේ නැහැ.
චුංග් නැමැති පුද්ගලයකු කියා තිබූ හද කම්පා කරවන කතාවක් මාධ්‍ය තුළ පළ වී තිබුණා. ඔහු පවසා තිබුණේ තමා එදින සිය රාජකාරි ස්ථානයේ සිටිය දී දහවල් සිය බිරිඳගෙන් දුරකතන ඇමතුමක් ලැබුණු බව යි. ඇය ඉතා බියට පත්ව සිටි බවත්, තමාටත්, තම සුරතල් බළලාටත් ගොඩනැගිල්ලෙන් පිටතට ඒමට අපහසු යයි පැවසූ බවත් ඔහු සඳහන් කළා.
චුංග් වහාම නිවෙස බලා පැමිණ තිබූ අතර එම අවස්ථාවේ ඔහුට දැක ගන්නට ලැබී තිබුණේ නිවාස සංකීර්ණය ගිනි දැල්වලින් වෙලී ගොස් ඇති ආකාරය යි. මොහොතින් මොහොත ගින්න වඩාත් බිහිසුණු වේෂයක් ගනිමින් තිබූ බවක් ද ඔහු ප්‍රකාශ කර තිබුණා. එයින් පසු ඔහුත්, බිරිඳත් ටික වෙලාවක් මහත් බියෙන් සහ ආතතියෙන් යුතුව එකිනකා සමග දුරකතනයෙන් කතා කරමින් සිටි බවත් ඔහු පවසනවා. ටික වේලාවකට පසු බිරිඳ පවසා තිබුණේ අවට ඇති දුම නිසා ඇය ක්ලාන්ත වීමට යන බව යි.
ඔහු බිරිඳ සමග කතා කළ අවසන් අවස්ථාව එය යි. තම බිරිඳ ඇය මහත් සේ ආදරය කළ සුරතලා ද සමග ගින්නට හසුව මිය යන්නට ඇති බව චුංග් කඳුළු සලමින් පවසනවා.
ගින්නෙන් මිය ගිය ඇතැම් අයගේ මළ සිරුරු තවමත් හඳුනාගෙන නැති බවත් සඳහන්.
මෙම නිවාස සංකීර්ණය ඉදිකර තිබුණේ 1983 වසරේ යි. එහි නිවාස 1,900 ක් පමණ ඇති බවත්, ඒවායේ ජීවත් වන සංඛ්‍යාව 4,600 ක් පමණ බවත් සඳහන් වෙනවා. මේ අතරින් බොහෝ දෙනෙකු වියපත් පුද්ගලයන් බවයි පැවසෙන්නේ. මෑතක කරන ලද ගණන් ගැනීමකින් හෙලි වී තිබුණේ මෙහි ජීවත් වන්නන්ගෙන් 40% ක් පමණ වයස අවුරුදු 65 ට වැඩි උදවිය බව යි.
මෙම බිහිසුණු ගින්න ආරම්භ වූ ආකාරය ගැන මෙම සටහන ලියන අවස්ථාව වන විටත් නිශ්චිතව අනාවරණය වී තිබුණේ නැහැ. තට්ටු නිවාස සංකීර්ණයේ එක් කොටසක අලුත්වැඩියාවක් සිදුවෙමින් තිබූ බවක් මාධ්‍ය වාර්තා කර තිබුණා. ඒ නිසා සමහර ගොඩනැගිලිවලට පිටින් බම්බු පලංචි ඉදි කර තිබූ බවත්, ප්ලාස්ටික් දැල් විශේෂයකින් ඒවා ආවරණය කර තිබූ බවත් සඳහන්. එමෙන්ම ප්ලාස්ටික් තහඩු විශේෂයක් ද මෙහි දී යොදා ගෙන තිබූ බව හෙලි වී තිබුණා. එම ගොඩනැගිල්ලේ නිවාසවල ජනෙල් ගිනි ගන්නා සුළු රිජිෆෝම් වැනි දෙයකින් ආවරණය කර තිබූ බවත් පැවසෙනවා. ගින්න වේගයෙන් පැතිරෙන්නට මේවායින් ලොකු උදව්වක් ලැබී ඇති බව මේ පිලිබඳ විමර්ශණ කරන පාර්ශ්වවල විශ්වාසය යි.
ගින්න හටගත් අවස්ථාව වනවිට එම ප්‍රදේශයේ දැඩි සුළඟක් තිබී ඇති බවත් සඳහන්. එකිනෙකට ආසන්නව පිහිටා ඇති ගොඩනැගිලි වෙත ගින්න රැගෙන යාමට මෙයත් උදව් වී තිබුණා.
ගින්නෙන් දිවි බේරා ගත් අය ප්‍රකාශ කළ විස්තර ද මාධ්‍ය තුළ පළ වී තිබෙනවා. එක් අයකු පවසා තිබුණේ තමාට යම් පිපිරුම් ශබ්දයක් ඇසුණු බව යි. නමුත් ගින්නට හේතුව එවැනි පිපිරුමක් ද යන්න තවම අනාවරණය වී නැහැ.
නිවාස සංකීර්ණයේ ගොඩනැගිලිවල සවිකර තිබූ ගිනි අනතුරු ඇඟවීමේ සංඥා ක්‍රියාත්මක වී නොමැති බවකුත් හෙලි වී තිබෙනවා. නිවෙස්වල සිටි ඇතැමුන් ගින්නක් පැතිරෙන බව දැනගෙන තිබුණේ අසල්වැසියන් දොරවල්වලට තට්ටු කර කීවාට පසුව යි. මේ ආකාරයෙන් අනතුරු ඇඟවීමේ සංඥා ක්‍රියාත්මක නොවීම මරණ සංඛ්‍යාව ඉහළ යාමට හේතුවක් වන්නට ඇතැයි ද සැලකෙනවා.
මාධ්‍ය වාර්තාවල දැක්වෙන ආකාරයට ගින්න සම්පූර්ණයෙන් මැඩ පැවැත්වීම සඳහා ගිනි නිවන කණ්ඩායම්වලට පැය 43 කට වැඩි කාලයක් ගත වී තිබුණා. ගොඩනැගිලි තුළ තිබූ ඉතා අධික උෂ්ණත්වය නිසා ගිනි නිවන භටයින්ට ඒවා තුළට ඇතුල් වීම ඉතා දුෂ්කර වී තිබූ බව පැවසෙනවා. ගින්න නිවා දැමීමෙන් පසුව පවා ඇතැම් ගොඩනැගිලි තුළ සෙන්ටිග්‍රේඩ් අංශක 200 කට වැඩි උෂ්ණත්වයක් පැවැති බව සඳහන්.
ගිනි ගත් පලංචිවල කොටස් දිගින් දිගටම කඩා වැටෙමින් තිබූ නිසාත්, නිවාස තුළ ලොකු ඉඩකඩක් නොතිබුණු නිසාත් ගලවා ගැනීමේ මෙහෙයුම් ඉතා දුෂ්කර වූ බව ගිනි නිවන හමුදාව ප්‍රකාශ කර තිබුණා.
මෙම මෙහෙයුම සඳහා ගිනි නිවන භටයින් 2,300 ක් පමණ ද, ගිනි නිවීමේ රථ 400 ක් පමණ ද යොදවා තිබූ බවත් නිලධාරීන් සඳහන් කර තිබෙනවා. තුවාල ලැබූවන් ප්‍රවාහනය කිරීම සඳහා ගිලන් රථ 190 ක් පමණ ද යොදා ගෙන තිබූ බැව් වාර්තා වුණා. ගිනි නිවන භටයින් 12 දෙනෙකු ද තුවාල ලබා තිබූ අතර මේ අතරින් එක් අයෙකු මරණයට පත් වුණා.
මෙම සිද්ධිය සම්බන්ධයෙන් මේ වනවිට තුන් දෙනෙකු අත්අඩංගුවට ගෙන ඇති බව වාර්තා වෙනවා. ඔවුන්ගෙන් දෙදෙනෙකු මෙහි ඉදි කිරීම් සමාගමේ අධ්‍යක්ෂවරුන්. තුන්වැන්නා ඉංජිනේරු උපදේශකයෙක්. ගින්න වේගයෙන් පැතිරීමට හේතුව ආරක්ෂාව පිලිබඳ ප්‍රමාණවත් තරමින් සැලකිල්ලක් නොදැක්වීම බවට චෝදනා එල්ල වී තිබෙනවා.
නිහාල් පීරිස්