වේද ග්‍රන්ථ, මනුස්මෘතිය ඇතුළු පුරාණ හින්දු ආගමික ලේඛන උපුටා දක්වමින් ගව ඝාතනය කිරීමේ චෝදනාවට වරදකරුවන් වූ පුද්ගලයන් තිදෙනකුට ඉන්දියාවේ ගුජරාට් ප්‍රාන්තයේ අධිකරණයක් බරපතළ වැඩ සහිත ජීවිතාන්තය දක්වා සිරදඬුවම් නියම කර තිබේ.ගාන්ධිනගර් දිස්ත්‍රික්කයේ කාලෝල් අතිරේක සැසි අධිකරණයේ විනිසුරු බ්‍රිජේෂ්කුමාරි රාජ්පුත් මහත්මිය විසින් පසුගිය ඔක්තෝබර් 26 වැනිදා මෙම තීන්දුව ප්‍රකාශයට පත්කර ඇත.පිටු 76කින් සමන්විත නඩු තීන්දුවේ ආරම්භක පිටු හතරෙහිම ගවයන්ට හින්දු ආගම හා සංස්කෘතිය තුළ හිමි වී ඇති විශේෂ ස්ථානය පිළිබඳව දීර්ඝ වශයෙන් කරුණු දක්වා තිබීම විශේෂත්වයකි.වේද ග්‍රන්ථ හා හින්දු ආගමික විශ්වාස උපුටා දක්වමින් අධිකරණය පෙන්වා දී ඇත්තේ ගවයා විශ්වයේ මෑණියන් ලෙස සැලකෙන බවත්, තිස්තුන් කෝටියක් දෙවිවරුන් වැඩවසන පූජනීය සත්ත්වයකු ලෙස හින්දු සම්ප්‍රදාය තුළ පිළිගැනෙන බවත්ය. එමෙන්ම ගවයාගේ පාද හතර වේද හතර සංකේතවත් කරන බවට ද එහි සඳහන් කර තිබේ.මනුස්මෘතිය ද උපුටා දක්වා ඇති විනිසුරුවරිය, ගවයන් රැකබලා ගැනීම හා ආරක්ෂා කිරීම සම්බන්ධයෙන් එහි සඳහන් කරුණු කෙරෙහි අවධානය යොමු කර ඇත. ගව ආරක්ෂාව ආගමික හා මානුෂීය වගකීමක් ලෙස ද අධිකරණය විස්තර කර තිබේ.මෙලෙස ජීවිතාන්තය දක්වා සිරදඬුවම් නියම වී ඇත්තේ අහමදාබාද්හි පදිංචිකරුවන් වන වසීම් කුරේෂි, මොහොමඩ් රෆීක් කුරේෂි සහ අස්ෆාක් බහෙලිම් යන තිදෙනාටය.2024 අගෝස්තු 22 වැනිදා ගුජරාට් ප්‍රාන්තයේ ගාන්ධිනගර් දිස්ත්‍රික්කයේ ජම්ලා ගම්මානයේ නිවසක් වැටලූ පොලිසිය විසින් මෙම පුද්ගලයන් සම්බන්ධයෙන් විමර්ශන ආරම්භ කර තිබිණි. එහිදී ගව මස් කිලෝග්‍රෑම් 277ක්, සතුන් ඝාතනය කිරීමට යොදාගත් බවට සැක කෙරෙන ආයුධ සහ මස් ප්‍රවාහනයට සූදානම් කර තිබූ වාහනයක් ද පොලිස් භාරයට ගෙන තිබේ. අත්අඩංගුවට ගත් මස්වල වටිනාකම ඉන්දීය රුපියල් 55,400ක් පමණ වූ බව වාර්තා වේ.විමර්ශනවලදී අනාවරණය වී ඇත්තේ වයස්ගත වූ හෝ කිරි ලබා නොදෙන ගවයන් සහ මී ගවයන් අඩු මිලට මිලදී ගෙන ඒවා ඝාතනය කර මස් අලෙවි කිරීමේ ව්‍යාපාරයක් පවත්වාගෙන යාමට සම්බන්ධ පිරිසක් මෙම ක්‍රියාවට දායක වී ඇති බවය.නඩු විභාගයේදී පැමිණිල්ල වෙනුවෙන් සාක්ෂිකරුවන් 54 දෙනකු සහ ලේඛනගත සාක්ෂි 18ක් ඉදිරිපත් කර තිබේ. ඒ අනුව චූදිතයන් හය දෙනකුගෙන් තිදෙනකු පමණක් වරදකරුවන් බවට තීරණය කර ඇත. තවත් දෙදෙනකු සාක්ෂි ප්‍රමාණවත් නොවීම හේතුවෙන් නිදොස් කොට නිදහස් කර ඇති අතර, පළමු විත්තිකරු නඩු විභාගය අතරතුර මියගොස් තිබේ.ගුජරාට් සත්ත්ව සංරක්ෂණ පනතේ 2017 සංශෝධනය යටතේ ගව ඝාතනය සම්බන්ධයෙන් ජීවිතාන්තය දක්වා සිරදඬුවම් නියම කිරීමේ ප්‍රතිපාදන පවතී. ඒ අනුව වරදකරුවන් තිදෙනාට ජීවිතාන්තය දක්වා බරපතළ වැඩ සහිත සිරදඬුවමට අමතරව එක් අයකුට ඉන්දීය රුපියල් ලක්ෂ දෙක බැගින් දඩයක් ද නියම කර තිබේ. තවත් වරදක් සම්බන්ධයෙන් වසර දහයක බරපතළ වැඩ සහිත සිරදඬුවමක් හා එක් අයකුට රුපියල් ලක්ෂයක දඩයක් ද නියම කර ඇති අතර, එම සිරදඬුවම් එකවර ක්‍රියාත්මක වන පරිදි තීන්දුව ලබා දී ඇත.“මෙලෙස අනුකම්පා විරහිතව ගවයන් ඝාතනය කරන පුද්ගලයන්ට නීතියෙන් නියමිත දඬුවම් ලබා නොදුනහොත් කාලයත් සමඟ ගව මාතාවන් මිහිතලයෙන් වඳ වී යනු ඇතැයි” අධිකරණය සිය තීන්දුවේදී වැඩිදුරටත් සඳහන් කර තිබේ.මෙම නඩු තීන්දුව ඉන්දියාවේ සත්ත්ව සංරක්ෂණ නීති ක්‍රියාත්මක කිරීම සම්බන්ධයෙන් මෙන්ම අධිකරණ තීන්දු සඳහා ආගමික හා සංස්කෘතික මූලාශ්‍ර යොදාගැනීම පිළිබඳව ද විශේෂ අවධානයක් යොමු කර ඇති සිදුවීමක් බවට පත්ව තිබේ.

Cited sources: