පොළොන්නරුව දිස්ත්රික් පාර්ලිමේන්තු මන්ත්රී අමරකීර්ති අතුකෝරල මහතා සහ ඔහුගේ ආරක්ෂක නිලධාරියා 2022 දී ඝාතනය කිරීම සම්බන්ධයෙන් වරදකරුවන් වූ දොළොස් දෙනෙකුට මරණ දඬුවම නියම කර තිබේ. දීර්ඝ නඩු විභාගයකින් පසු ගම්පහ මහාධිකරණය විසින් මෙම දඬුවම ප්රකාශයට පත් කරන ලදී. තවත් පුද්ගලයන් හතර දෙනෙකුට වසර පහකට අත්හිටුවන ලද මාස හයක සිර දඬුවම් නියම කර ඇත. ඒ අතර තවත් විත්තිකරුවන් 23 දෙනෙකු ගම්පහ මහාධිකරණය මඟින් නිදොස් කොට නිදහස් කරන ලදී.
මෙම තීන්දුව ප්රකාශ කොට ඇත්තේ නඩුවේ සැකකරුවන් අද (11) උදෑසන ගම්පහ මහාධිකරණ නඩු විභාගයට ඉදිරිපත් කරන ලද අවස්ථාවේදීය. පසුගිය ජනවාරි 14 වැනිදා පැවැති ගම්පහ මහාධිකරණ නඩු විභාගය මඟින් මෙම නඩුවේ තීන්දුව ප්රකාශයට පත් කිරීම අද දක්වා කල් තබන ලදී.
2022 මැයි 09 වැනිදා රට පුරා පැතිර ගිය ප්රචණ්ඩ ක්රියා අතරතුර, නිට්ටඹුව ප්රදේශයේ ඇති වූ කලහකාරී වාතාවරණය මධ්යයේ, පොළොන්නරුව දිස්ත්රික් පාර්ලිමේන්තු මන්ත්රීවරයා සහ ඔහුගේ ආරක්ෂක නිලධාරියා වන පොලිස් කොස්තාපල්වරයකු මියගොස් තිබිණි. මුලින්ම, එදින සවස නිට්ටඹුව ප්රදේශයේ වෙඩි තැබීමේ සිද්ධියක් වාර්තා වූ අතර පසුව තුවාල ලැබූ පුද්ගලයන් හය දෙනෙකු වතුපිටිවල මූලික රෝහලට ඇතුළත් කරන ලදී. රෝහල් ආරංචි මාර්ග පසුව තහවුරු කළේ ඔවුන්ගෙන් තිදෙනෙකු වෙඩි වැදී තුවාල ලබා ඇති බවයි. නමුත් බරපතළ තත්ත්වයේ පසුවූ 27 හැවිරිදි තරුණයකු පසුව මියගියේය.
වාර්තාවලට අනුව, පාර්ලිමේන්තු මන්ත්රීවරයා සහ ඔහුගේ ආරක්ෂක නිලධාරියා වාහනය අවහිර කරමින් සිටි විරෝධතාකරුවන් පිරිසකට වෙඩි තබා, දෙදෙනෙකුට බරපතළ තුවාල සිදු කර ඇත. පසුව මන්ත්රීවරයා සහ ඔහුගේ ආරක්ෂක නිලධාරියා අසල ගොඩනැගිල්ලක් තුළ සැඟවී සිටියදී ඝාතනයට ලක්ව ඇති බව සොයා ගන්නා ලදී. අසල තිබූ CCTV කැමරාවකින් ලබාගත් දර්ශනවල දැක්වෙන්නේ තුවක්කුවක් අතැතිව සිටි ඔහුගේ ආරක්ෂක නිලධාරියා සමඟ පාර්ලිමේන්තු මන්ත්රී අමරකීර්ති අතුකෝරල මහතා එම ස්ථානයෙන් පලා යන ආකාරයයි.
මන්ත්රීවරයාගේ ඝාතනයට සම්බන්ධ බවට සැකපිට සැකකරුවන් ගණනාවක් පසුව අවස්ථා කිහිපයකදී අත්අඩංගුවට ගෙන තිබිණි. ඒ අනුව, ඝාතන සම්බන්ධයෙන් පුද්ගලයන් 42 දෙනෙකුට එරෙහිව නීතිපතිවරයා ගම්පහ මහාධිකරණය හමුවේ අධිචෝදනා ගොනු කොට තිබිණි.