පසුගිය (16) වැනිදා අලුයම වනවාසල ප්රදේශයේදී සිදු වූ දුම්රිය අනතුරට හේතු වූ, දුම්රිය මාර්ගයෙන් ගලවා ඉවත් කරන ලද කොටස් සහ උපාංග රුපියල් 3,000ක් වැනි සුළු මුදලකට අලෙවි කර ඇති බව බස්නාහිර පළාත් උතුර භාර නියෝජ්ය පොලිස්පති කාලිංග ජයසිංහ මහතා අනාවරණය කළේය. අද (17) පැවති විශේෂ මාධ්ය හමුවකට එක්වෙමින් ඒ මහතා කියා සිටියේ සොරකම් කරන ලද එම දුම්රිය කොටස් මිලදී ගත් ස්ථානය මේ වන විට හඳුනාගෙන ඇති අතර, එම ව්යාපාරික ආයතනයේ හිමිකරු ද පොලිස් අත්අඩංගුවට ගෙන ඇති බවයි.දුම්රිය අනතුරට ක්ෂණික හේතුව වූ බෝල්ට් ඇණ ගැලවීම සහ දුම්රිය මාර්ගයේ කොටස් විසුරුවා හැරීම සම්බන්ධයෙන් පොලිසිය විසින් මුලින්ම ප්රධාන සැකකරුවෙකු රඳවාගෙන සිටියේය. එම සැකකරුගෙන් සිදු කරන ලද දීර්ඝ හා දැඩි ප්රශ්න කිරීම්වලින් අනතුරුව, සොරකම් කරන ලද භාණ්ඩ මිලදී ගත් මෙම ව්යාපාරිකයා පිළිබඳ තොරතුරු අනාවරණය කර ගැනීමට හැකි වූ බව නියෝජ්ය පොලිස්පතිවරයා පැවසීය. අත්අඩංගුවට ගත් ප්රධාන සැකකරු දරුණු ලෙස මත්ද්රව්යවලට ඇබ්බැහි වූ 25 හැවිරිදි තරුණයෙකු බව ද හෙතෙම සඳහන් කළේය.මෙහිදී අදහස් දැක්වූ නියෝජ්ය පොලිස්පති ජයසිංහ මහතා, සුළු මූල්ය වාසියක් තකා මෙවැනි නොසැලකිලිමත් සොරකම්වල යෙදෙන පුද්ගලයන් රටට සිදු කරන විනාශය දැඩි ලෙස හෙළා දුටුවේය. ඔවුන්ගේ මෙම අදූරදර්ශී ක්රියාවන් හේතුවෙන් රුපියල් මිලියන ගණනක පොදු දේපළ හානියක් සිදුවනවා පමණක් නොව, අහිංසක මිනිස් ජීවිත ද දැඩි විනාශකාරී අවදානමකට ලක්වන බව ඔහු පෙන්වා දුන්නේය. මේ වන විට සිද්ධිය සම්බන්ධයෙන් අඛණ්ඩව හා ඉතා උනන්දුවෙන් පරීක්ෂණ ක්රියාත්මක වන අතර, අත්අඩංගුවට ගත් සියලුම සැකකරුවන් නියමිත වේලාවට අධිකරණයට ඉදිරිපත් කිරීමට නියමිතය.තවද, මෙම සාපරාධී ක්රියාව සම්බන්ධයෙන් සැකකරුවන්ට එරෙහිව දැඩි ලෙස නීතිය ක්රියාත්මක කරන බව නියෝජ්ය පොලිස්පතිවරයා අවධාරණය කළේය. එහිදී පොදු දේපළ විනාශ කිරීමේ චෝදනාවට අමතරව, එම විනාශයේ ප්රතිඵලයක් ලෙස දුම්රිය අනතුරෙන් සිදු වූ පුළුල් හානිය සහ මූල්ය පාඩුව සම්බන්ධයෙන් ද සැකකරුවන්ට එරෙහිව නීතිමය ක්රියාමාර්ග ගැනෙනු ඇත. එමෙන්ම, සොරකම් කරන ලද පොදු දේපළ බව දැන දැනම ඒවා මිලදී ගත් පුද්ගලයාට ද, සොරකම් කළ පුද්ගලයාට හා සමාන වූ බරපතලකමකින් යුතුව නඩු පැවරීමට කටයුතු කරන බව ද නියෝජ්ය පොලිස්පති කාලිංග ජයසිංහ මහතා වැඩිදුරටත් ප්රකාශ කළේය.