ලංකා ඛනිජ තෙල් නීතිගත සංස්ථාව ඊයේ (01) මධ්‍යම රාත්‍රී 12.00 සිට ක්‍රියාත්මක වන පරිදි සියලුම ප්‍රධාන ඉන්ධන වර්ගවල මිල ගණන් සංශෝධනය කර තිබේ.ඒ අනුව ඔක්ටේන් 92 සහ ඔක්ටේන් 95 පෙට්‍රල් මෙන්ම ලංකා සුදු ඩීසල් සහ ලංකා සුපිරි ඩීසල් මිල ගණන් ද ඉහළ දමා ඇති අතර, භූමිතෙල් මිලෙහි කිසිදු වෙනසක් සිදු කර නොමැත.නව මිල සංශෝධනය අනුව ඔක්ටේන් 92 පෙට්‍රල් ලීටරයක මිල රුපියල් 10කින් ඉහළ දමා ඇති අතර එහි නව මිල රුපියල් 424කි. ඔක්ටේන් 95 පෙට්‍රල් ලීටරයක මිල රුපියල් 15කින් ඉහළ දමා ඇති අතර එහි නව මිල රුපියල් 490කි.ලංකා සුදු ඩීසල් ලීටරයක මිල රුපියල් 5කින් ඉහළ දමා රුපියල් 397ක් කර තිබේ. ලංකා සුපිරි ඩීසල් ලීටරයක මිල රුපියල් 15කින් ඉහළ දමා ඇති අතර එහි නව මිල රුපියල් 543කි.කෙසේ වෙතත්, ලංකා භූමිතෙල් ලීටරයක මිල රුපියල් 285ක් ලෙස පෙර පැවති මිලෙහිම පවත්වාගෙන යාමට පියවර ගෙන තිබේ.

සංශෝධිත මිල ගණන් මෙසේය.

මෙම මාසික මිල සංශෝධනය රජය හඳුන්වා දී ඇති ඉන්ධන මිල සූත්‍රයට අනුව සිදුකර තිබේ. ජාත්‍යන්තර වෙළෙඳපොළේ ඉන්ධන මිල ගණන්, ඉන්ධන ආනයන පිරිවැය සහ විනිමය අනුපාත ඇතුළු සාධක එහිදී සැලකිල්ලට ගැනේ.

ලංකා ඛනිජ තෙල් නීතිගත සංස්ථාව මිල සංශෝධනය කිරීමෙන් අනතුරුව සෙසු ඉන්ධන අලෙවි සමාගම් ද සිය මිල ගණන් සංශෝධනය කිරීම සාමාන්‍යයෙන් සිදුවන අතර, ඒ අනුව එම සමාගම්වල මිල ගණන් පිළිබඳව ද අවධානය යොමුව තිබේ.