අනුරාධපුර කහටගස්දිගිලිය, මීමින්නාවල ප්‍රදේශයේ කායන්ගොල්ලෑව වැව ආසන්නයේ කැලෑබද ප්‍රදේශයක තිබී එක් දළයක් කපා ඉවත් කරන ලද වන අලියකුගේ මළ සිරුරක් වනජීවී නිලධාරීන් විසින් සොයාගෙන තිබේ.ප්‍රදේශවාසීන්ගෙන් ලද තොරතුරකට අනුව එම ස්ථානයට ගිය වනජීවී නිලධාරීන් මෙම මළ සිරුර සොයාගෙන ඇති අතර, ඒ වන විටත් සත්වයා මියගොස් දින කිහිපයක් ගතවී තිබූ බව නිරීක්ෂණය වී ඇත.මළ සිරුර පරීක්ෂා කිරීමේදී ඇතාගේ වම්පස දළය කපා ඉවත් කර ඇති බව අනාවරණය වී තිබේ. කිසියම් පුද්ගලයකු හෝ සංවිධානාත්මක කණ්ඩායමක් විසින් මෙම ඇතා වෙඩි තබා ඝාතනය කර පසුව දළය කපාගෙන යන්නට ඇතැයි සැක කෙරේ. කෙසේ වෙතත්, ඝාතනයට නිශ්චිත හේතුව සහ ඊට සම්බන්ධ පුද්ගලයන් මෙතෙක් තහවුරු වී නොමැත.ප්‍රදේශවාසීන්ගේ සැකය වී ඇත්තේ මෙලෙස මරා දමා ඇත්තේ එම ප්‍රදේශයේ කලක් සැරිසැරූ ‘ලංකේෂ්වර’ නමැති දළ ඇතා විය හැකි බවයි. එහෙත් මියගිය සත්වයාගේ අනන්‍යතාව මෙතෙක් වනජීවී බලධාරීන් විසින් නිල වශයෙන් තහවුරු කර නැත.සිද්ධිය සම්බන්ධයෙන් කහටගස්දිගිලිය වනජීවී කාර්යාලය, දිවුල්වැව පොලිසිය සහ ශ්‍රී ලංකා යුද හමුදාව ඒකාබද්ධව විමර්ශන ආරම්භ කර තිබේ. ඇතාගේ මරණයට හේතුව, දළය කපා ඉවත් කළ ආකාරය සහ ඊට සම්බන්ධ පුද්ගලයන් හඳුනාගැනීම එම විමර්ශනවල අරමුණ වී ඇත.මෙම සිද්ධිය වාර්තා වන්නේ ගල්ගමුව, සියඹලන්ගමුව ප්‍රදේශයේදී ‘කාවන්තිස්ස’ නමැති ප්‍රකට දළ ඇතා වෙඩි වැදීමෙන් තුවාල ලබා ප්‍රතිකාර ලබමින් සිටියදී ඔක්තෝබර් 16 වැනිදා මියගොස් සති කිහිපයක් ගතවීමටත් පෙරය. කාවන්තිස්සගේ මරණය සම්බන්ධයෙන් සැකකරුවන් දෙදෙනකු අත්අඩංගුවට ගෙන අධිකරණයට ඉදිරිපත් කර තිබූ අතර, එම මරණයට අදාළ සියලු කරුණු විමර්ශනය කිරීමට ජනාධිපති අනුර කුමාර දිසානායක මහතා විශේෂඥ කමිටුවක් ද පත් කර තිබේ.කාවන්තිස්සගේ මරණයෙන් පසු වන අලි සංරක්ෂණය හා ඔවුන්ගේ ආරක්ෂාව සම්බන්ධයෙන් රජය ගන්නා ක්‍රියාමාර්ග පිළිබඳව පරිසරවේදීන් සහ සත්ව හිමිකම් ක්‍රියාධරයන් දිගින් දිගටම ප්‍රශ්න කරමින් සිටින පසුබිමක තවත් දළ ඇතෙකුගේ මළ සිරුරක් දළයක් කපා ඉවත් කර තිබියදී හමුවීම විශේෂ අවධානයට ලක්ව තිබේ.විශේෂයෙන්ම දළ ඇතුන් ඉලක්ක කරගනිමින් සිදුවන මෙවැනි අපරාධ වැළැක්වීම සඳහා පවතින ආරක්ෂක වැඩපිළිවෙළෙහි ප්‍රමාණවත්භාවය පිළිබඳව ද මෙයින් බරපතළ ප්‍රශ්න මතු වේ. වන අලියකුගේ දළයක් යනු නීති විරෝධී වෙළෙඳාමට යොදාගත හැකි වටිනා කොටසක් වුවද, එවැනි ජාවාරමක් සිදුවූ බවට නිශ්චිත නිගමනයකට එළඹීමට විමර්ශන අවසන් වනතුරු හැකියාවක් නැත.එබැවින් ‘ලංකේෂ්වර’ ඇතාගේ අනන්‍යතාව තහවුරු කිරීම, මරණයට හේතුව විද්‍යාත්මකව නිශ්චය කිරීම සහ දළය කපාගෙන ගිය පුද්ගලයන් නීතිය හමුවට පැමිණවීම බලධාරීන් සතු ප්‍රමුඛ වගකීමක් බව පරිසර හා සත්ව සංරක්ෂණ ක්ෂේත්‍රයේ අවධානය යොමුව තිබේ.