ග්‍රෑම් 450ක පාන් ගෙඩියක මිල රුපියල් 5කින් ඉහළ නැංවීමට සමස්ත ලංකා බේකරි හිමියන්ගේ සංගමය තීරණය කර තිබේ.ඒ අනුව මෙම මිල සංශෝධනය ඊයේ (30) මධ්‍යම රාත්‍රියේ සිට ක්‍රියාත්මක වන අතර, පාන් ඇතුළු අනෙකුත් බේකරි නිෂ්පාදන සහ කෙටි ආහාරවල මිල ද රුපියල් 5කින් ඉහළ නංවා ඇත.සංගමයේ සභාපති එන්. කේ. ජයවර්ධන මහතා සඳහන් කර ඇත්තේ තිරිඟු පිටි මිල ඉහළ යාම ඇතුළු නිෂ්පාදන පිරිවැය වැඩිවීම හමුවේ මෙම තීරණය ගැනීමට සිදුවූ බවයි.පසුගිය ඔක්තෝබර් 20 වැනිදා මධ්‍යම රාත්‍රියේ සිට තිරිඟු පිටි කිලෝග්‍රෑමයක මිල රුපියල් 13කින් ඉහළ නැංවීමට පිටි සමාගම් කටයුතු කර තිබේ. එම මිල ඉහළ නැංවීම සම්බන්ධයෙන් පාරිභෝගික කටයුතු පිළිබඳ අධිකාරිය දැනුවත් කිරීමක් සිදුකර නොතිබීම පිළිබඳව ද අවධානය යොමුවී තිබිණි.මේ සම්බන්ධයෙන් සංගමය පාරිභෝගික කටයුතු පිළිබඳ අධිකාරියේ වැඩබලන අධ්‍යක්ෂ ජනරාල් සමන්ත කරුණාරත්න මහත්මිය සමඟ සාකච්ඡා කර ඇති අතර, වෙළෙඳ අමාත්‍යවරයා විදේශගතව සිට යළි පැමිණෙන තෙක් බේකරි නිෂ්පාදන මිල ඉහළ නොදමන ලෙස ද එහිදී ඉල්ලීමක් කර තිබේ.ඒ අනුව දින දහයක පමණ කාලයක් මිල සංශෝධනයකින් තොරව කටයුතු කළ ද දිවයින පුරා බේකරි හිමියන්ගෙන් මිල ඉහළ නංවන ලෙස දැඩි ඉල්ලීම් ඉදිරිපත් වූ බව සංගමයේ සභාපතිවරයා පවසා ඇත.මැදපෙරදිග පවතින යුදමය තත්ත්වය සහ ජාත්‍යන්තර දේශපාලනික අස්ථාවරත්වය හමුවේ තිරිඟු පිටි මිල ඉදිරියේදී පහළ යනු ඇතැයි අපේක්ෂා කළ නොහැකි බව ද ඔහු පෙන්වා දී තිබේ.අමුද්‍රව්‍ය ඇතුළු නිෂ්පාදන වියදම් ඉහළ යාම හමුවේ බේකරි කර්මාන්තය පවත්වාගෙන යාමට මෙම මිල සංශෝධනය අත්‍යවශ්‍ය වී ඇති බව ද සංගමය සඳහන් කරයි.කෙසේ වෙතත්, මෙම මිල වැඩිවීමත් සමඟ පාන් සහ අනෙකුත් බේකරි නිෂ්පාදන දෛනිකව මිලදී ගන්නා පාරිභෝගික ජනතාවට අමතර ආර්ථික බරක් දැරීමට සිදුවනු ඇත.