ඉන්දීය සිනමාවේ අසහාය රංගන ශිල්පියෙකු මෙන්ම සුවිශේෂී පෞරුෂයකින් හෙබි ප්‍රවීණ රංගන ශිල්පී නානා පටේකර් වයස අවුරුදු 75ක්ව සිටියදී අද (8) අලුයම අභාවප්‍රාප්ත වී තිබේ.හින්දි සහ මරාති සිනමාව තුළ දශක හතරකට වැඩි කාලයක් පුරා සුවිශේෂී රංගන දායකත්වයක් ලබාදුන් නානා පටේකර් ගෝවා ප්‍රාන්තයේ දෝනා පෝලාහි පිහිටි සිය නිවසේදී සිහිසුන්ව ඇද වැටීමෙන් අනතුරුව රෝහල්ගත කර තිබිණි. ඔහුට දැඩි හෘදයාබාධයක් හෙවත් හෘද ක්‍රියාකාරීත්වය අකර්මණ්‍ය වීමක් සිදුව ඇති බව රෝහල් ආරංචි මාර්ග සඳහන් කරයි.ඔහුගේ තත්ත්වය යථා තත්ත්වයට පත් කිරීමට වෛද්‍යවරුන් මිනිත්තු 45කට ආසන්න කාලයක් අඛණ්ඩව CPR ප්‍රතිකාර ලබා දුන්නද ඔහුගේ ජීවිතය බේරා ගැනීමට නොහැකි වී තිබේ. මණිපල් රෝහලේ වෛද්‍ය ෂේකර් සල්කාර් විසින්ද මෙම මරණය තහවුරු කර ඇති අතර, පෙරවරු 5.20ට පමණ ඔහු මියගිය බව වාර්තා වේ. මරණය සම්බන්ධයෙන් වෛද්‍ය-නීතිමය පරීක්ෂණයක් ද ආරම්භ කර ඇති අතර පශ්චාත් මරණ පරීක්ෂණයක් පැවැත්වීමට නියමිත බව සඳහන් වේ.1951 ජනවාරි 1 වැනිදා මහාරාෂ්ට්‍ර ප්‍රාන්තයේ උපත ලැබූ නානා පටේකර්ගේ උපන් නාමය විශ්වනාත් පටේකර් විය. රංගන දිවිය වේදිකා නාට්‍ය තුළින් ආරම්භ කළ ඔහු 1978 වසරේ තිරගත වූ ‘ගමන්’ චිත්‍රපටය හරහා සිනමාවට පිවිසියේය. ඉන් අනතුරුව ඔහුගේ ප්‍රබල හඬ, දැඩි ප්‍රකාශන ශෛලිය සහ චරිතයක අභ්‍යන්තර ස්වභාවය ඉතා ගැඹුරින් නිරූපණය කිරීමේ හැකියාව හේතුවෙන් ඉන්දීය සිනමාවේ අනන්‍ය රංගන ශිල්පියෙකු බවට පත්විය.‘පරින්දා’, ‘ප්‍රහාර්’, ‘ක්‍රාන්තිවීර්’, ‘අග්නි සාක්ෂි’, ‘අබ් තක් චප්පන්’, ‘අපහරණ’, ‘වෙල්කම්’ සහ මරාති සිනමාවේ ‘නට්සම්රාට්’ ඇතුළු චිත්‍රපට රැසක ඔහු ඉදිරිපත් කළ චරිත ප්‍රේක්ෂකයන් අතර මහත් ජනප්‍රියත්වයක් හිමිකර ගත්තේය. විශේෂයෙන් ‘වෙල්කම්’ චිත්‍රපටයේ උදේ ෂෙට්ටි චරිතය ඔහුගේ රංගන පරාසයේ වෙනස්ම පැතිකඩක් ප්‍රේක්ෂකයන්ට හඳුන්වා දුන්නේය.‘පරින්දා’ චිත්‍රපටය වෙනුවෙන් හොඳම සහාය රංගන ශිල්පියා ලෙසද, ‘ක්‍රාන්තිවීර්’ වෙනුවෙන් හොඳම නළුවා ලෙසද, ‘අග්නි සාක්ෂි’ වෙනුවෙන් නැවතත් හොඳම සහාය රංගන ශිල්පියා ලෙසද ඔහු ජාතික චිත්‍රපට සම්මානයෙන් පිදුම් ලබා තිබේ. ඉන්දීය කලාව වෙනුවෙන් කළ දායකත්වය අගය කරමින් 2013 වසරේදී ඔහුට පද්ම ශ්‍රී සම්මානය ද පිරිනමා තිබිණි.රංගනයට පමණක් සීමා නොවූ නානා පටේකර් චිත්‍රපට අධ්‍යක්ෂවරයකු සහ රචකයකු ලෙසද කටයුතු කළේය. 1991 වසරේ ‘ප්‍රහාර්: ද ෆයිනල් ඇටෑක්’ චිත්‍රපටය අධ්‍යක්ෂණය කරමින් ඔහු එම ක්ෂේත්‍රයටද සිය දායකත්වය ලබා දුන්නේය.දශක හතරකට වැඩි කාලයක් පුරා චරිතාංග රංගනයේ සුවිශේෂී සලකුණක් තැබූ නානා පටේකර්ගේ හදිසි අභාවය ඉන්දීය සිනමා ක්ෂේත්‍රයට මෙන්ම ඔහුගේ රංගනයට ආදරය කළ ලොව පුරා ප්‍රේක්ෂකයන්ටද දැඩි කම්පනයක් ගෙන දී තිබේ.