වේගයෙන් ව්යාප්ත වෙමින් පවතින ඩෙංගු වයිරසය මර්දනය කිරීම සඳහා රාජ්ය ආයතන, පාසල් සහ පළාත් පාලන ආයතන ආවරණය වන පරිදි ගත යුතු ක්රියාමාර්ග පිළිබඳ චක්රලේඛ නිකුත් කිරීමටත්, හෙට (24) අනිද්දා (25) සහ 26 යන තෙදින තුළ ග්රාම නිලධාරී වසම් 600ක් ආවරණය වන පරිදි ජාතික ඩෙංගු මර්දන වැඩසටහන් ක්රියාත්මක කිරීමටත් රජය ඊයේ (22) තීරණය කර ඇත.
නිරිතදිග මෝසම් සමය හේතුවෙන් ශීඝ්ර ලෙස ව්යාප්ත වන ඩෙංගු උවදුර මර්දනය සඳහා ගත යුතු කෙටි කාලීන සහ දිගු කාලීන සැලසුම් පිළිබඳ සාකච්ඡාවක් සෞඛ්ය සහ ජනමාධ්ය අමාත්ය වෛද්ය නලින්ද ජයතිස්ස සහ ජනාධිපති ලේකම් ආචාර්ය නන්දික සනත් කුමානායක මහත්වරුන්ගේ ප්රධානත්වයෙන් ජනාධිපති කාර්යාලයේදී ඊයේ (22) පැවති අවස්ථාවේදී මේ තීරණය ගන්නාලදි.
මේ වසරේ පළමු වරට එක් දිනකදි වාර්තා වූ වැඩිම ඩෙංගු රෝගීන් ගණන ඊයේ (22) වාර්තා වූ අතර එය රෝගීන් 1096ක් ලෙස සටහන් වී ඇත. සමස්ත ඩෙංගු රෝගීන් සංඛ්යාව 47179කි. මේ වසරේ මේ වන විට ඩෙංගු මරණ 28ක් වාර්තා වී ඇත. ඩෙංගු අවදානම් සෞඛ්ය වෛද්ය නිලධාරී කොට්ඨාස 112ක් හඳුනාගෙන තිබෙන අතර වැඩිම ඩෙංගු ව්යාප්තියක් මහරගම සෞඛ්ය වෛද්ය නිලධාරී කොට්ඨාසයෙන් වාර්තා වන බව සෞඛ්ය අංශ අවධාරණය කරයි.
ජනාධිපති කාර්යාලයේදී පැවති මේ සාකච්ඡාවේදී ත්රිවිධ හමුදාවේ මූලිකත්වයෙන් අධීක්ෂණ ඒකකයක් පිහිටුවීම සහ නීතිමය ක්රියාමාර්ග දැඩි කිරීමටද, මේ වන විට ප්රාදේශීය මට්ටමින් පිහිටුවා ඇති ප්රජා ශක්ති සහ මහජන ආරක්ෂක කමිටු මඟින් ඩෙංගු මර්දන කටයුතු තවදුරටත් ශක්තිමත් කිරීමටද තීරණය විය.
මේ වන විට පාසල්, කර්මාන්තශාලා, රාජ්ය ආයතන සහ ආගමික ස්ථාන බහුල වශයෙන් ඩෙංගු මදුරුවන් බෝවන ස්ථාන ලෙස හඳුනා ගෙන ඇති බැවින් එම ස්ථාන ආවරණය වන පරිදි කෙටි කාලීන ක්රියාමාර්ග කඩිනම් කිරීමටද නියමිතයි. තවද වරින් වර ඇතිවන මෙවැනි ප්රවණතා මඟ හරවා ගැනීමට ගත යුතු දිගු කාලීන ක්රියාමාර්ග පිළිබඳවද මෙහිදී දීර්ඝ ලෙස සාකච්ඡාවට ලක් විය.