ශ්‍රී ලංකාවේ ඇඟලුම් අපනයන ආදායම 2026 වසරේ මුල් මාස නවය තුළදී සියයට 5.3කින් පහත වැටී ඇතැයි ශ්‍රී ලංකා මහ බැංකු දත්ත අනාවරණය කරයි.ඒ අනුව, 2026 ජනවාරි සිට සැප්තැම්බර් දක්වා කාලය තුළ ඇඟලුම් අපනයනයෙන් උපයා ඇති ආදායම ඇමෙරිකානු ඩොලර් බිලියන 3.52ක් පමණ වී තිබේ. එය 2025 වසරේ අදාළ කාලසීමාව තුළ වාර්තා වූ ආදායමට සාපේක්ෂව කැපී පෙනෙන පහත වැටීමකි.ශ්‍රී ලංකාවේ ප්‍රධාන විදේශ විනිමය උපයන කර්මාන්තයක් වන ඇඟලුම් ක්ෂේත්‍රයේ මෙම පසුබෑම ආර්ථික අංශයේ අවධානයට ලක්ව තිබේ. විශේෂයෙන්ම ඇඟලුම් කර්මාන්තය මෙරට අපනයන ආදායමට මෙන්ම රැකියා උත්පාදනයට ද විශාල දායකත්වයක් සපයන බැවින් එහි වර්ධනයේ හෝ පසුබෑමේ බලපෑම පුළුල්ය.මෙම පහත වැටීමට බලපා ඇති ප්‍රධාන හේතුවක් ලෙස ඇමෙරිකා එක්සත් ජනපදය සහ යුරෝපා සංගමය ඇතුළු ප්‍රධාන අපනයන වෙළෙඳපොළවල පවතින දුර්වල ඉල්ලුම හඳුනාගෙන තිබේ. ශ්‍රී ලංකාවේ ඇඟලුම් අපනයනවලින් අඩකට වැඩි ප්‍රමාණයක් මෙම වෙළෙඳපොළවල් වෙත යොමු කෙරේ.අපනයන සංවර්ධන මණ්ඩලයේ (EDB) දත්තවලට අනුව ද 2026 ජනවාරි සිට සැප්තැම්බර් දක්වා කාලය තුළ ඇඟලුම් හා රෙදිපිළි අපනයන ආදායම සියයට 5.68කින් පහත වැටී ඇමෙරිකානු ඩොලර් මිලියන 3,783.76ක් වී තිබේ. එයින් ඇඟලුම් අපනයන ආදායම ඩොලර් මිලියන 3,513.37ක් වන අතර රෙදිපිළි අපනයන ආදායම ඩොලර් මිලියන 270.39කි.ප්‍රධාන වෙළෙඳපොළවල අපනයන ආදායම පහත වැටීම ද මෙම පසුබෑමට හේතු වී ඇත. ඇමෙරිකානු වෙළෙඳපොළ වෙත සිදු කළ ඇඟලුම් අපනයන සියයට 3.83කින් ද, යුරෝපා සංගමය වෙත සිදු කළ අපනයන සියයට 5.54කින් ද, එක්සත් රාජධානිය වෙත සිදු කළ අපනයන සියයට 10.41කින් ද පහත වැටී තිබේ.කෙසේ වෙතත් සැප්තැම්බර් මාසයේදී ඇඟලුම් අපනයන ක්ෂේත්‍රයේ යම් ප්‍රකෘතිමත් වීමක් දක්නට ලැබී තිබේ. ඒකාබද්ධ ඇඟලුම් සංගම් සංසදයේ (JAAF) දත්ත අනුව එම මාසයේ ඇඟලුම් අපනයන ආදායම පෙර වසරේ සැප්තැම්බර් මාසයට සාපේක්ෂව සියයට 3.47කින් ඉහළ ගොස් ඇමෙරිකානු ඩොලර් මිලියන 416.99ක් වී ඇත. එහෙත් එම මාසික වර්ධනය වසරේ මුල් මාස නවයේ සමස්ත පසුබෑම පියවා ගැනීමට ප්‍රමාණවත් වී නැත.මේ අතර, සමස්ත අපනයන ක්ෂේත්‍රය සැලකීමේදී 2026 මුල් මාස නවය තුළ ශ්‍රී ලංකාවේ භාණ්ඩ අපනයන ආදායම සියයට 5.35කින් වර්ධනය වී ඇමෙරිකානු ඩොලර් බිලියන 10.76ක් වී තිබේ. ඒ අනුව ඇඟලුම් හා රෙදිපිළි කර්මාන්තයේ පසුබෑම සමස්ත අපනයන ක්ෂේත්‍රයේ වර්ධනයට වෙනස් ප්‍රවණතාවක් පෙන්නුම් කරයි.

ශ්‍රී ලංකාවේ ප්‍රධාන කර්මාන්ත හා විදේශ විනිමය උපයන මාර්ගයක් වන ඇඟලුම් ක්ෂේත්‍රයේ මෙම පසුබෑම හමුවේ නව අපනයන වෙළෙඳපොළ සොයා ගැනීම, පවතින වෙළෙඳපොළවල තරගකාරීත්වය රැක ගැනීම සහ නිෂ්පාදන පිරිවැය පාලනය කිරීම කෙරෙහි වැඩි අවධානයක් යොමු කිරීමේ අවශ්‍යතාව මතුව තිබේ.