අල්ලස් කොමිසම විසින් ගොනුකර තිබූ නඩුවක් සඳහා වරෙන්තු නිකුත් කොට තිබිය දී කොළඹ මහාධිකරණය හමුවේ අද (29) පෙරවරුවේ පෙනී සිටි හිටපු අමාත්‍ය රාජිත සේනාරත්න මහතා රක්ෂිත බන්ධනාගාර ගතකර ඇත.රාජිත සේනාරත්න මහතා කොළඹ මහාධිකරණ විනිසුරු ලංකා ජයරත්න මෙනෙවිය හමුවට ඉදිරිපත් කිරීමෙන් පසුව විනිසුරු වරිය මෙම නියෝගය ලබා දී තිබේ.ධීවර වරායන්හි වැලි ඉවත් කිරීමේ කොන්ත්‍රාත්තුවක් දූෂිත අයුරින් පෞද්ගලික සමාගමකට ලබාදීම සම්බන්ධයෙන් වන එම නඩුවට අදාළ වරෙන්තුව පදනම් කරගනිමින්, හිටපු අමාත්‍යවරයාට මහාධිකරණය මගින් මීට පෙර ලබාදී තිබූ ඇප අවලංගු කර ඔහුව රක්ෂිත බන්ධනාගාර ගතකරන ලෙස අල්ලස් කොමිසම අධිකරණයෙන් ඉල්ලා සිටියේය. එම ඉල්ලීම පිළිගත් මහාධිකරණ විනිසුරු වරිය මෙම නියෝගය නිකුත් කළාය.ඒ අනුව ඔහු කොළඹ මහෙස්ත්‍රාත් අධිකරණයට ඉදිරිපත් කරන තුරු රිමාන්ඩ් භාරයේ රඳවා තැබෙනු ඇත.