අද Wall එක ඔස්සේ අප ඔබට හඳුන්වා දෙන වසන්තා ශ්‍යාමලී සුබසිංහ නව කතා සහ කාව්‍ය රසික රසිකාවියනට අමුතුවෙන් හඳුන්වා දිය යුතු ලේඛිකාවක නොවේ.ඊට හේතුව ඇය ලියූ නවකතා දහයක් සහ කවිපොත් පහක් මුද්‍රණයෙන් මේ වන විටත් කල එළි දැක තිබීම ය.
විවිධ වස්තු බීජ තේමා කොට ඇය ගනිමින් ලියා ඇති සිතුවිලි දෙසිත,විකසිත සියපත,සඳ දුරයි,සත් සිඳු රළ සහ යකඩ දෝලි ඇගේ කාව්‍ය නිර්මාණ වන අතර කවියක් ද මේ ප්‍රේමය, හීනයක් පාට පාටින්,දේදුනු පාලම,පච්චයා,පාට්නර්,කන්දෙ වලව්ව,ඔබ මගෙමද,පුරසඳ දුටිමි,තරු හොයන අහසක් සහ ස්වර්ණ තටු වසන්තා ශ්‍යාමලී ලියූ නවකතා ය
ඒ අතර මේ වන විට මුහුණු පොතේ ඇය ලියූ නවකතා විස්සකට වැඩි ප්‍රමාණයක් පළ වී ඇති අතර පුවත් පත් කාව්‍ය පිටු අතර ඇගේ කවි සිය දහස් ගණනක් පළවී ඇත.රැජින,දිවයින තමන්ට කිවිඳියයක ලෙස පෙරට එන්නට අත දුන් පුවත් පත් අතර මුල්තැන ගන්නා බව ඇය කියයි.එමඟින් ලත් පරිචය මුල් කොට වසන්තා ශ්‍යාමලී මේ වන විට අපෙ අම්මා පුවත් පතේ කවි පිටුවේ සංස්කාරක වරිය ද වන්නීය.
මීරිගම, මාලදෙනියේ ඉපදී ගම්/ කඳන්ගමුව මහා විද්‍යාලයෙන් සාමාන්‍ය පෙළ සමත්ව උසස්පෙළ ගම්පහ රත්නාවලී බාලිකා විද්‍යාලයෙන් උසස්පෙළ ලබා පසුව ජනසන්නිවේදනය හා ලේඛකත්ව පාඨමාලාවක්ද හදාරා ඇති වසන්තා ශ්‍යාමලී මේ වන විට මේ වන විට විවාහක තිදරු මවක වන අතර සුන්දර මුතුරාජවෙල තෙත් බිමට මායිම් වූ පමුණුගම, නුගපෙ ග්‍රාමයේ පදිංචි ව හිඳින්නී ය.
දැන් අපි වසන්තා ශ්‍යාමලී ගේ කවි සිතට පිවිසි “දෙවන මනාලිය” ගේ පැතුම කවර ආකාරයේ එකක් දැයි විමසා බලමු.
දෙවනි මනාලිගෙ පැතුම
දම්පාට දිග මල්ගවුම එක්කළ
මල් රවුම තියන් ඔලුවෙන්
මම ආව ඔයාගෙ මනමාලි ළඟින්ම
හිනාවක් ඇදන් දෙවනි මනමාලිට
දන්නවද මේකප් ආටිස්ට් ට
අමාරු උනා මගෙ හිනාව අඳින්න
ලස්සන මූණක් හිනාවක් නැතත් මරු
තට්ටුවක් දාල හිනා උනා ඒ මනුස්සයත්
කමක් නෑ කියන්න බෑ දුකට
වරක් රැවටුණා මං ඔයාට
කලක් ගිය ඒ ප්‍රේමයේ කතාව
නිමාවක් කරන්නම් තියා තිතක්
සත්තයි මනමාලි මළත් මං
වෙන්නෙ නම් නෑ ඔයාගෙ බිරිඳක්
ඒක නියමයක් උනත් දෙවනි මනාලිට
කඩනවා එදාට මං ඒ නියමයත්
පතන් නෑ මැරෙන්න නම් මනමාලි
ඔයා විඳවන්න ඕනැ මෙයා එක්කම
දන්නවද? මගෙ යෙහෙළියක් උනාට
මේකි මහ නපුරියක් වේවි ඔයාට
වසන්තා ශ්‍යාමලී සුබසිංහ