ඊයේ (13) මධ්‍යම රාත්‍රියේ සිට ක්‍රියාත්මක වන පරිදි ගෘහස්ථ ලාෆ්ස් (LAUGFS) ගෑස් මිල ගණන් සියයට 35කට වැඩි ප්‍රතිශතයකින් ඉහළ දැමීමට ලාෆ්ස් ගෑස් සමාගම පියවර ගෙන තිබේ.ඒ අනුව මෙතෙක් රුපියල් 4,965ක්ව පැවැති කිලෝග්‍රෑම් 12.5ක ගෘහස්ථ ගෑස් සිලින්ඩරයක මිල රුපියල් 1,775කින් ඉහළ දමා ඇති අතර, එහි නව මිල රුපියල් 6,740ක් දක්වා ඉහළ ගොස් තිබේ. මෙම වැඩිවීම සියයට 35.75ක පමණ ප්‍රතිශතයකි.එමෙන්ම රුපියල් 1,988ක්ව පැවැති කිලෝග්‍රෑම් 5ක ගෑස් සිලින්ඩරයක මිල රුපියල් 732කින් ඉහළ දමා ඇති අතර, ඒ අනුව එහි නව මිල රුපියල් 2,720කි. එය සියයට 36.82ක පමණ මිල වැඩිවීමකි.අන්තර්ජාතික වෙළෙඳපොළේ ද්‍රව පෙට්‍රෝලියම් වායු (Liquefied Petroleum Gas – LPG) මිල ගණන් ඉහළ යාම හේතුවෙන් මෙරටට ගෑස් ආනයනය කිරීමේ සහ සැපයුම් ලබාගැනීමේ පිරිවැය ඉහළ යාම මෙම මිල සංශෝධනයට හේතු වී ඇති බව ලාෆ්ස් ගෑස් සමාගම සඳහන් කරයි.මේ අතර, ගෑස් මිල ඉහළ දැමුවද ගෘහස්ථ හා වාණිජ පාරිභෝගිකයන් සඳහා අඛණ්ඩව ගෑස් සැපයීමට තම සමාගම කැපවී සිටින බව ද එම සමාගම පවසයි. ඉදිරියේදී සිදුකරන මිල සංශෝධන ද අන්තර්ජාතික වෙළෙඳපොළේ පවතින LPG මිල ගණන් සහ ආනයන පිරිවැය සැලකිල්ලට ගනිමින් තීරණය කරන බව සමාගම වැඩිදුරටත් සඳහන් කර තිබේ.ගෑස් මිල මෙලෙස ඉහළ යාමත් සමඟ ගෘහස්ථ ආහාර පිසීමේ වියදමට මෙන්ම ගෑස් භාවිතය මත යැපෙන හෝටල්, ආපනශාලා සහ කුඩා පරිමාණ ආහාර නිෂ්පාදන ව්‍යාපාරවල මෙහෙයුම් වියදම්වලට ද අමතර බලපෑමක් එල්ල විය හැකි බව පාරිභෝගිකයෝ පෙන්වා දෙති.විශේෂයෙන්ම ගෑස් මිල ඉහළ යාමත් සමඟ ආහාරපාන අලෙවි කරන ව්‍යාපාරවල නිෂ්පාදන පිරිවැය ඉහළ යාම හරහා එම වියදම්වලින් කොටසක් පාරිභෝගික භාණ්ඩ හා සේවා මිල ගණන් වෙත ද මාරු වීමේ හැකියාවක් පවතී.මේ අතර, ලාෆ්ස් ගෑස් සිලින්ඩර ලබාගත හැකි ස්ථාන සහ දිස්ත්‍රික් මට්ටමින් ක්‍රියාත්මක වන මිල ගණන් පිළිබඳ තොරතුරු ලබාගැනීම සඳහා සමාගමේ 1345 ක්ෂණික ඇමතුම් අංකය අමතන ලෙස ද පාරිභෝගිකයන්ට දැනුම් දී තිබේ.