හෝමුස් සමුද්ර සන්ධිය (Strait of Hormuz) නැවත විවෘත කිරීමේ ක්රියාවලියේදී ඇමරිකාවේ සමීපතම මිත්ර රාජ්යයක් වන ඕමානය, ඉරානයේ පාර්ශවය ගතහොත් ඔවුන් වෙත ප්රහාර එල්ල කරන බවට ඇමරිකානු ජනාධිපති ඩොනල්ඩ් ට්රම්ප් තර්ජනාත්මක ස්වරූපයෙන් ප්රකාශ කර තිබේ. ධවල මන්දිරයේ පැවැති කැබිනට් මණ්ඩල රැස්වීමකින් අනතුරුව මාධ්යවේදීන් ඇමතූ ජනාධිපතිවරයා, මෙම මුහුදු මාර්ගයේ පාලනය ඉරානයට සහ ඕමානයට හිමිකර දීම සඳහා වන කෙටි කාලීන එකඟතාවයකට තමන් එකඟ වන්නේදැයි නැඟූ ප්රශ්නයකට පිළිතුරු දෙමින් කියා සිටියේ ඕමානය “හොඳින් හැසිරිය යුතු” බවත්, නැතහොත් තමන් ඔවුන්ව “පුපුරුවා හරින” බවත්ය. මෙම සමුද්ර සන්ධිය සැමටම විවෘත ජාත්යන්තර මුහුදු තීරයක් බව අවධාරණය කළ ට්රම්ප්, අනෙක් සෑම රටක් මෙන්ම ඕමානයද නීතිගරුකව කටයුතු කළ යුතු බවත්, ඔවුන් මෙම තත්ත්වය තේරුම් ගනු ඇතැයි තමන් විශ්වාස කරන බවත් වැඩිදුරටත් සඳහන් කළේය.
කෙසේ වෙතත්, මැදපෙරදිග කලාපීය ගැටුම් නිමා කිරීම සඳහා දීර්ඝ කාලයක සිට විශ්වාසවන්ත මැදිහත්කරුවෙකු ලෙස කටයුතු කරන, එමෙන්ම ඉරාන හිතවාදීන්ගේ ප්රහාරයන්ට පවා ලක්ව ඇති ඇමරිකාවේ ප්රධානතම මිත්ර රාජ්යයකට මෙවැනි තර්ජනයක් එල්ල කිරීම ලෝක දේශපාලන විචාරකයන්ගේ මවිතයට හේතු වී තිබේ. මේ හේතුවෙන්, ජනාධිපති ට්රම්ප්ට මෙහිදී කිසියම් වැරදීමක් සිදුවූයේද, එනම් “ඕමානය” වෙනුවට ඔහුට පැවසීමට අවශ්යව තිබුණේ “ඉරානය” යන නමයන්නදැයි ඒ.එෆ්.පී. (AFP) පුවත් සේවය ධවල මන්දිරයෙන් විමසීමක් කර ඇතත්, ඒ සඳහා වහාම ප්රතිචාර දැක්වීමට ධවල මන්දිරය කටයුතු කර නැත. ගෝලීය බලශක්ති සැපයුමට අතිශය තීරණාත්මක මුහුදු මාර්ගයක් වන හෝමුස් සමුද්ර සන්ධියේ ආරක්ෂාව සම්බන්ධයෙන් පවතින උණුසුම්කාරී වාතාවරණය හමුවේ, ඇමරිකානු ජනාධිපතිවරයාගේ මෙම ප්රකාශය රාජ්ය තාන්ත්රික බලපෑමක් ඇති කළ හැකි සිදුවීමක් ලෙස සැලකේ.